Jizzax shahrida barpo etilgan zamonaviy oxirgi bekat majmuasi tumanlarga qatnovchi avtobus va mikroavtobuslarga, shuningdek, yo‘nalishsiz taksilarga xizmat ko‘rsatadi. Bu haqda O‘zbekiston avtomobil va daryo transporti agentligi axborot xizmati xabar bermoqda.

2014-yil 17-yanvar kuni O‘zbekiston Respublikasi Bosh vaziri o‘rinbosari B. Zakirov raisligida o‘tkazilgan Jizzax viloyatida qurilish va obodonlashtirish ishlarini amalga oshirish masalalariga bag‘ishlangan sayyor yig‘ilish bayonnomasida viloyatning avtotransport infratuzilmasini rivojlantirishga doir chora-tadbirlar ham qayd etilgan edi. Yaqinda hukumatning ushbu topshirig‘i ijrosi doirasida viloyat markazidagi “Eski shahar dehqon bozori” yonida shahar ichi va shahar atrofi yo‘nalishlarida muntazam qatnovchi avtobus va mikroavtobuslar uchun oxirgi bekat majmuasi qurilib, foydalanishga topshirildi.

Qiymati 150 million so‘mga teng ushbu majmua qurilishini Jizzax shahridagi “Oltin Toj Kapital” MChJ o‘z hisobidan moliyalashtirdi. Loyihaga muvofiq, Mirzacho‘l, Do‘stlik, Arnasoy, Zafarobod, Paxtakor va Jizzax tumanlariga qatnovchi, shuningdek, Jizzax shahri ichki yo‘nalishlarida harakatlanuvchi avtobus va mikroavtobuslar uchun perronlar, yo‘nalishsiz taksi mashinalari uchun to‘xtash joyi barpo etildi. Majmua zamonaviy jihozlangan bo‘lib, unda yo‘lovchilarga mo‘ljallangan qulayliklar, qo‘shimcha maishiy xizmat inshootlari ham nazarda tutilgan.