Rossiyaning “Vokrug sveta” nashri dunyodagi eng chiroyli metro bekatlarini e’lon qildi.
Nashrning ro‘yxatidan birinchi bo‘lib Moskvadagi “Komsomolskaya” metro bekati o‘rin oldi. Bundan tashqari, Rossiya poytaxtidagi “Kiyevskaya”, “Ploshchad Revolyutsii” (“Inqilob maydoni”) bekatlari, shuningdek, Sankt-Peterburgdagi “Kirovskiy zavod” (“Kirov zavodi”) bekati ham o‘zining chiroyi bilan ajralib turadi, deyiladi xabarda.
Chiroyli bekatlari eng ko‘p bo‘lgan Shvetsiya poytaxti Stokgolmdagi metroni tez-tez badiiy galereya deb ham atashadi. Ko‘rgazma, tanlov va festivallar o‘tkazilib turadigan mazkur metro dizayni ustida 1950-yillardan beri 140 ga yaqin rassom ish olib borgan.
Germaniyaning Frankfurt shahri metropolitenining asosiy bekati “Bokengeymer Varte”ga kirish joyi yerga kirib ketgan poyezdni yodga soladi. Mazkur noodatiy metroga kirish joyini arxitektor Zbignev Piter Pininski yaratgan.
Italiyaning Neapol shahridagi metropolitenning “Toledo” bekati arxitektor Oskar Tuskets tomonidan yaratilgan bo‘lib, suvosti olamini eslatadi.
Portugaliya poytaxti Lissabondagi Tomas Taveyra mualliflik qilgan “Olayas” metro bekati surat solingan rangli oynalardan iborat.
Kanadaning Monreal shahrida joylashgan “Shamp-de-Mars” metro bekati esa rassom Marsel Ferron qalamiga mansub suratli oynalar bilan bezatilgan.
Tayvandagi Gaosyun shahridagi “Bulvar Formoza” (“Formoz xiyoboni”) metro bekati har xil rangli oynalardan yasalgan diametri 30 metrlik gumbazdan iborat. Suratda rassom Narsiss Kvolyata suv, yorug‘lik, yer va olovni tasvirlagan.
Gaosyun shahridagi yana bir “Markaziy bog‘” metro bekati ham o‘ziga xos ko‘rinishga ega. Bekatga tushish joyida ikki taraflama haqiqiy o‘simliklar ekilgan bo‘lib, u kichik bog‘ni yodga soladi.
Singapurda 2002-yil ochilgan “Changi aeroporti” metro bekati aeroport terminallarini ham bog‘laydi. Uning 100 ming kvadrat metrdan iborat katta hududida anjumanlar zali ham bor.
Shimoliy Koreyaning Pxenyan shahri metropoliteni 110 metr chuqurlikda joylashgan bo‘lib, uning “Rekonstruksiya” bekati o‘zining murakkab naqshlari va ulug‘vor qandillari bilan ajralib turadi.
Kiyevdagi “Zolotiye Vorota” (“Oltin darvozalar”) metro bekati marmar va granit toshlari bilan bezatilgan.
Dunyoning eng chiroyli metro bekatlari ro‘yxatidan Rossiyadagi haqiqiy saroyga o‘xshash “Slavyanskiy bulvar” (“Slavyan xiyoboni”) metro bekati ham joy olgan.
Izoh (0)