O‘zbekiston—Qirg‘iziston—Xitoy—Mo‘g‘uliston koridori bo‘ylab 5-iyun kuni birinchi pilot yuk tashuvi tashkil etildi, deb xabar bermoqda Transport vazirligi matbuot xizmati.
Qayd etilishicha, pilot yuk tashuvi O‘zbekiston tadbirkorlari tomonidan ishlab chiqarilgan mahsulotlarni yangi bozorlarga olib chiqish, avtomobil transportida yangi koridorlarda yuk tashuvlarini yo‘lga qo‘yish maqsadida Savdo-sanoat palatasi bilan hamkorlikda tashkil etildi.
“Ishtirokchi davlatlar o‘rtasidagi samarali hamkorlik va ushbu transport yo‘lagini rivojlantirish bo‘yicha qo‘shma sa’y-harakatlar natijasida savdo aylanmasi o‘sishi va transport-logistika aloqalarining kengayishi uchun yangi istiqbollar ochilmoqda”, deyiladi vazirlik xabarida.
Ta’kidlanishicha, bu yo‘nalish davlatlar o‘rtasida eksport va import yuk tashuvlari hajmini oshirishga, savdo aloqalari geografiyasini kengaytirishga hamda tovarlarni yetkazib berish muddatlarini qisqartirishga xizmat qiladi.
Dunyo logistika bozoridagi vaziyatni inobatga olganda, mazkur koridorning rivojlanishi o‘zbek milliy tashuvchilari uchun o‘z biznesini kengaytirish, samaradorlikni oshirish hamda mintaqaviy va global darajadagi o‘rinlarni mustahkamlashda muhim ahamiyatga ega.
Koridorning yo‘nalishi va maqsadi
Yangi transport yo‘lagi O‘zbekistondan Qirg‘iziston orqali Xitoyga, so‘ngra Mo‘g‘ulistonga o‘tadi. Bu yo‘l Yevrosiyo mintaqasida yuk tashishning muqobil va samarali yo‘nalishini taqdim etadi, ayniqsa Xitoy va Mo‘g‘uliston bozorlariga chiqish imkoniyatlarini kengaytiradi.
Izoh (0)