O‘zbekiston Markaziy saylov komissiyasi saytida 21-dekabr kuni bo‘lib o‘tgan parlament saylovlari yakuniga ko‘ra Oliy Majlis Qonunchilik palatasiga saylangan deputatlar ro‘yxati (pdf) e’lon qilindi. Bu haqda “Gazeta.uz”ga asoslanib “Kun.uz” xabar bermoqda.
Avval xabar berilganidek, 135 saylov okrugining 113 tasidan deputatlar saylandi, 15 nafar deputat esa O‘zbekiston Ekologik harakati konferensiyasida saylandi.
Birorta ham nomzod yetarli miqdorda ovoz to‘play olmagan 22 ta okrugda esa 4-yanvar kuni qayta saylovlar bo‘lib o‘tadi.
Ro‘yxatga olingan deputatlar orasida O‘zLiDeP vakillari 47 nafarni, “Milliy tiklanish” demokratik partiyasi vakillari 28 nafarni, Xalq demokratik partiyasi vakillari 21 nafarni va “Adolat” SDP vakillari 17 nafarni tashkil etadi.
Hozircha saylangan 128 nafar deputatning 38 nafari Qonunchilik palatasining avvalgi tarkibida ham deputat edi, xususan, Ekoharakatdan 10 nafar deputat qayta saylandi.
Izoh (0)