Farg‘ona viloyati Yozyovon tumanining Qoratepa qishlog‘ida istiqomat qiluvchi shaxs “Quva paxtani qayta ishlash zavodi” aksiyadorlik jamiyatiga mavsumiy ishga kirganda oilasining iqtisodiy muammolarini hal etishni, dasturxonini yanada to‘kin qilishni diliga tukkan edi. Biroq o‘ziga hisoblangan ish haqini vaqtida ololmadi. Oxir-oqibat najot istab, Farg‘ona viloyat adliya boshqarmasining “Ishonch telefoni”ga sim qoqdi, deb xabar bermoqda “Inson va qonun” nashri.
Mazkur murojaat boshqarma mutaxassislari tomonidan batafsil o‘rganib chiqildi. Aniqlanishicha, 2013-yil 1-aprelda Qoratepa qishlog‘ida yashovchi shaxs va jamiyat o‘rtasida ishlarni bajarish va xizmatlar ko‘rsatish bo‘yicha fuqarolik-huquqiy tusdagi 48-sonli shartnoma tuzilgan. Shartnomaning amal qilish muddati 2013-yil 1-iyulgacha bo‘lgan, ya’ni fuqaro uch oy muddatga ishga qabul qilingan. Unga 1 million 65 ming so‘m ish haqi hisoblangan, biroq iyun oyida fuqaroga 160 ming so‘m berilgan, xolos. Qolgan 905 ming so‘mni to‘lashni esa jamiyat hisobchilari paysalga solib kelgan. Vaholanki, bajarilgan ishlar dalolatnomasiga asosan har oylik ish haqi keyingi oyning 5-sanasiga qadar to‘lanishi lozim edi.
Qoratepalik o‘z murojaatida ish haqini vaqtida ololmagani natijasida jamoasi, qarindosh-urug‘ va qo‘ni-qo‘shnilari orasida obro‘-e’tiboriga putur yetganini ma’lum qilib, ish haqi bilan birga ma’naviy zarar ham undirib berishni so‘ragan.
Ayni murojaatni o‘rganish mobaynida “Quva paxtani qayta ishlash zavodi” AJ mutasaddilari yana 15 nafar ishchining 11 million 954 ming 590 so‘mlik ish haqini to‘lamaganligi aniqlandi. Shu bois viloyat adliya boshqarmasi tomonidan qoratepalik fuqaroga to‘lanmagan 905 ming so‘m ish haqi va 1 million so‘m ma’naviy zarar undirish, 15 nafar ishchining esa 11 million 954 ming 590 so‘mlik ish haqini undirish yuzasidan sud buyrug‘i chiqarishni so‘rab, fuqarolik ishlari bo‘yicha Farg‘ona tumanlararo sudiga da’vo ariza kiritildi.
Sud majlisiga qadar jamiyat tomonidan qoratepalikning ish haqi to‘lab berildi. Binobarin, sud 15 nafar ishchining ish haqini undirishga oid sud buyrug‘i berish barobarida da’vogarning ma’naviy zarar undirish haqidagi talabini 500 ming so‘mga qanoatlantirdi. Ma’naviy zarar jamiyat raisi va bosh hisobchisidan undirildi.
Izoh (0)