O‘zbekistonda talabalar bilimini baholash oliy ta’lim muassasalari reytingini tuzish doirasida tashkil etiladi, deya xabar bermoqda Davlat test markazi rasmiy sayti.
Joriy yilda O‘zbekiston Respublikasi Vazirlar Mahkamasining 2012-yil 29-dekabrdagi “Respublika oliy ta’lim muassasalari reytingini baholash tizimini joriy etish chora-tadbirlari to‘g‘risida”gi 371-sonli qarori ijrosi yuzasidan jami 69 ta oliy ta’lim muassasasi (shu jumladan 11 ta hududiy filiallar) reyting jarayonida ishtirok etmoqda.
Respublikamiz oliy ta’lim muassasalari yuqori bosqich talabalarining mutaxassislik fanlari bo‘yicha bilimlarini va fanlarni o‘zlashtirish darajasini aniqlash maqsadida har bir oliy ta’lim muassasasidan 3 tadan asosiy tayanch ta’lim yo‘nalishlari tanlab olinib, ularda tahsil olayotgan jami 17228 nafar bitiruvchilar to‘g‘risida ma’lumotlar bazasi shakllantirildi.
Test sinovlariga tanlangan ta’lim yo‘nalishlaridan bitiruvchilarning o‘rtacha 31,6 foizi (5443 nafari) jalb qilinmoqda. Buning uchun respublika bo‘yicha jami 264 ta akademik guruhlar tanlab olindi.
Test sinovlarini o‘tkazish bo‘yicha Oliy va o‘rta maxsus ta’lim vazirligi bilan Davlat test markazi o‘rtasida qo‘shma qaror qabul qilindi. Test sinovlari jarayonida Davlat test markazi xodimlari bilan birgalikda vazirlik vakillari va jamoatchi ekspertlar kuzatuvchi sifatida ishtirok etadi.
Testlar hududiy OTMlarda 2—6-dekabr kunlari, poytaxtda esa 9—13-dekabr kunlari o‘tkaziladi. Ularning natijalari bo‘yicha talabalar bilimi va pedagoglar malakasi baholanadi.
Izoh (0)