“Valensiya” Messiga shisha idish otgan muxlisni jazolashga va’da berdi

“Valensiya” klubi “Barselona”ga qarshi o‘yinda kataloniyaliklar hujumchisi Lionel Messiga shisha idish otgan muxlisni topib, uni umrbod stadionga kirishdan mahrum qilishga va’da berdi, deb xabar bermoqda “Uff.uz”.

Mehmonlar yarim himoyachisi Serxio Buskets tomonidan kiritilgan yagona golni nishonlash vaqtida tribunadagi muxlislardan biri tomonidan uloqtirilgan shisha idish Messining boshiga tekkan. Ammo hakam bu vaziyatni ko‘rmay qoldi. Buning ustiga, hakamga bu vaziyatni bildirib e’tiroz qilgan Messini sariq kartochka bilan “siyladi”.

“Klub kechirim so‘raydi. Biz Messiga shisha idish uloqtirgan muxlisni qattiq qoralaymiz. Uni topish uchun bor kuchimizni sarflaymiz. O‘sha muxlis kim bo‘lishidan qat’i nazar, bir umr stadionga kirishdan mahrum qilinadi. ‘Valensiya’ bu borada amaldagi qonunchilik bo‘yicha ish ko‘radi”, - deyiladi klub bayonotida.