Namanganda aholi topshirgan qo‘lyozmalar orasidan Mahmud Zamaxshariyning noyob kitobi topildi

Axsikent arxeologiya parki tarkibidagi Yangi Axsi qo‘lyozmalar markazida 4 mingdan ortiq nodir kitoblar saqlanmoqda. Bu haqda “Daryo” muxbiri Azizbek Abduvaliyev xabar bermoqda.

 Ularning aksariyati VII-XVIII asrlarga oid noyob qo‘lyozmalar hisoblanadi.

Markazdagi manbalar soni yaqinda yana 40 taga ko‘paydi. Mahalliy aholi tomonidan taqdim etilgan qo‘lyozmalar orasida eng qimmatlisi Mahmud Zamaxshariyning arab tili grammatikasiga oid “Al-mufassal” kitobi bo‘ldi.

“1121-yilda bitilgan ushbu asar arab tili nahv va sarfni o‘rganishda yirik qo‘llanma sifatida azaldan Sharq va G‘arbda mashhur bo‘lgan”, deydi markaz rahbari Bilolxon Rustamov.

Shuningdek, markazga topshirilgan kitoblar orasida 1870—1905-yillarda Qozon, Ufa va Toshkentda toshbosma usulda chop etilgan “Tazkiratul avliyo”, “Sharhu Aqoidi Nasafiya” kabi nodir manbalar mavjud.

Tarix, adabiyot, mantiq va boshqa fanlarga oid qolgan qo‘lyozma asarlar hozirda tadqiq etilmoqda.