“Kamolot yoshlar oromgohi”da “Yilning eng yaxshi biznes treneri” nomi aniqlandi
Hududlardan tashrif buyurgan “Yosh tadbirkor” konsultativ markazining 110 nafar koordinator va biznes trenerlari uchun joriy yilning 16—20-noyabr kunlari Toshkent viloyati Bo‘stonliq tumanida joylashgan “Kamolot yoshlar oromgohi”da “Yoshlarni tadbirkorlikka keng jalb etish maqsadida barcha hududlarda yosh tadbirkorlar uchun ‘Biznes inkubator’larni tashkil etish”ga bag‘ishlangan o‘quv-seminar o‘tkazildi. Bu haqda tahririyatga “Kamolot” YoIH Markaziy Kengashidan kelib tushgan press-relizda so‘z boradi.
O‘quv-seminar doirasida Harakatning joylardagi tashkil etilgan “Yosh tadbirkor” konsultativ markazlari o‘rtasida “Yilning eng yaxshi koordinatori” hamda “Yilning eng yaxshi biznes treneri” tanlovlari g‘oliblari aniqlandi.
Xususan, Harakatning Xorazm viloyati Kengashi qoshida tashkil etilgan “Yosh tadbirkor” konsultativ markazi koordinatori Jamshid Allashukurov “Yilning eng yaxshi koordinatori” deb topilgan bo‘lsa, “Yilning eng yaxshi biznes treneri” nomiga Qoraqalpog‘iston Respublikasi “Yosh tadbirkor” konsultativ markazi biznes treneri Bahodir Adichayev sazovor bo‘ldi.
G‘oliblar Harakat tomonidan joriy etilgan qimmatbaho sovg‘alar, planshet va uyali telefon bilan taqdirlandi.
