Ҳудудлардан ташриф буюрган «Ёш тадбиркор» консултатив марказининг 110 нафар координатор ва бизнес тренерлари учун жорий йилнинг 16—20 ноябрь кунлари Тошкент вилояти Бўстонлиқ туманида жойлашган «Камолот ёшлар оромгоҳи»да «Ёшларни тадбиркорликка кенг жалб этиш мақсадида барча ҳудудларда ёш тадбиркорлар учун ‘Бизнес инкубатор’ларни ташкил этиш»га бағишланган ўқув-семинар ўтказилди. Бу ҳақда таҳририятга «Камолот» ЁИҲ Марказий Кенгашидан келиб тушган пресс-релизда сўз боради.
Ўқув-семинар доирасида Ҳаракатнинг жойлардаги ташкил этилган «Ёш тадбиркор» консультатив марказлари ўртасида «Йилнинг энг яхши координатори» ҳамда «Йилнинг энг яхши бизнес тренери» танловлари ғолиблари аниқланди.
Хусусан, Ҳаракатнинг Хоразм вилояти Кенгаши қошида ташкил этилган «Ёш тадбиркор» консультатив маркази координатори Жамшид Аллашукуров «Йилнинг энг яхши координатори» деб топилган бўлса, «Йилнинг энг яхши бизнес тренери» номига Қорақалпоғистон Республикаси «Ёш тадбиркор» консультатив маркази бизнес тренери Баҳодир Адичаев сазовор бўлди.
Ғолиблар Ҳаракат томонидан жорий этилган қимматбаҳо совғалар, планшет ва уяли телефон билан тақдирланди.
Изоҳ (0)