Toshkentda O‘zbekistondagi Polsha Elchixonasi savdo va investitsiyaga ko‘maklashish bo‘limi tomonidan O‘zbekiston va Polsha davlatlarining o‘zaro iqtisodiy hamkorligini rivojlantirish masalasiga bag‘ishlangan matbuot anjumani bo‘lib o‘tdi. Bu haqda “Turkiston-press” xabar berdi.
Anjumanda aytib o‘tilishicha, joriy yilning yanvar—sentabr oylarida Polsha—O‘zbekiston savdo aylanmasi 127,5 million dollarni tashkil qildi. Shu davrda Polshaning O‘zbekistonga eksporti 104 million dollarga teng bo‘ldi. Umuman olganda, savdo aylanmasi hajmi o‘tgan yilga nisbatan 97 foizni tashkil qilmoqda.
Mazkur pasayish asosan tashqi salbiy omillar ta’siri bilan bog‘liqligi ta’kidlandi. Natijada, Polsha eksporti tovar guruhlarining 19 tadan 17 taga kamayishi, shuningdek yirik qoramol, o‘simlik mahsulotlari, tayyor oziq-ovqat va boshqa yetakchi eksport guruhlari hajmining pasayishi kuzatildi. Bir vaqtning o‘zida o‘simlik moyi, ulardan ishlangan mahsulotlar, to‘qimachilik, yengil sanoat, tosh, gips, sement, asbest, shisha buyumlarning eksporti jadal sur’atlarda o‘sib bordi. Shu bilan birga, mashina, uskunalar, rangli metallardan ishlangan buyumlar ta’minoti ham oshdi.
O‘zbek mahsulotlarining Polshaga importi esa joriy yil boshidan buyon 23,2 million dollardan oshdi. 9 oy mobaynida o‘zbek eksporti 13 ta mahsulot guruhi tomonidan taqdim etilgan bo‘lsa, o‘tgan yilning mos davrida bu ko‘rsatkich 11 ta guruhni tashkil qilgan edi. Hisobot davrida O‘zbekistondan Polshaga rangli metallardan ishlangan buyumlar, o‘simliklardan yetishtirilgan mahsulotlar, paxta tolasi, to‘qimachilik va kimyoviy sanoat mahsulotlarini yetkazib berish hajmlari sezilarli o‘sdi.
Izoh (0)