Amerikaning Florida shtatida sud AQShning ikkinchi eng yirik tamaki kompaniyasi — R.J. Reynolds Tobacco’ga o‘pka saratonidan vafot etgan kashandaning oilasiga 23,6 milliard dollar tovon puli to‘lash majburiyatini yukladi. Bu haqda mahalliy OAVlarga asoslanib, “ITAR-TASS” xabar berdi.
Reynolds Tobacco’ga qarshi da’vo 2008-yilda Sintiya Robinson tomonidan berilgan. Uning eri Maykl Jonson 1996-yilda 36 yoshida vafot etgan.
Ayolning advokati sudda aytishicha, Jonson 13 yoshidan cheka boshlagan, umrining so‘nggi kunigacha ham bu odatini tark etmagan. Uning kunlik me’yori uch quti sigaretadan iborat bo‘lgan.
Sud to‘rt hafta davom etdi. Unda advokatlar tamaki kompaniyasi odamlarga chekishning zarari haqida yetarlicha ma’lumot bermaganini isbotlashdi.
Advokat da’vo berilishidan asosiy maqsad tamaki kompaniyalari o‘z reklama kampaniyalari obyekti sifatida bolalardan foydalanishni to‘xtatishiga erishishdan iborat ekanini aytdi.
Izoh (0)