Rossiya Prezidenti Vladimir Putin futbol bo‘yicha jahon chempionatining final bosqichi va yopilish marosimiga tashrif buyuradi, deb xabar berdi “RIA Novosti” Vladimir Putinning yordamchisi Yuriy Ushakov bayonotiga tayanib.
Yuriy Ushakovning aytishicha, yopilish marosimi davomida Braziliya prezidenti Dilma Russeff va futbol bo‘yicha xalqaro federatsiya prezidenti Yozef Blatterning Rossiya prezidenti Vladimir Putin bilan uchrashuvi bo‘lib o‘tadi. Uchrashuvda Braziliya Rossiyaga estafeta tayoqchasini topshiradi.
Argentina va Germaniya terma jamoalari o‘rtasidagi JCh — 2014 final uchrashuvi 13-iyul (Toshkent vaqti bilan 14-iyulga o‘tar kechasi 0:00)da Rio-de-Janeyrodagi “Marakana” stadionida bo‘lib o‘tadi.
Eslatib o‘tamiz, Rossiya Federatsiyasi 2018-yilgi jahon chempionatiga mezbonlik qiladi. Jahon chempionati — 2018 o‘yinlari mamlakatning 11 shahri — Moskva, Sankt-Peterburg, Samara, Saransk, Rostov-na-Donu, Sochi, Qozon, Kaliningrad, Volgograd, Nijniy Novgorod va Yekaterinburgda bo‘lib o‘tadi.
Izoh (0)