Dunyodagi eng yirik ijtimoiy tarmoq bo‘lmish Facebook foydalanuvchilarni ogohlantirmasdan ular ustida psixologik eksperiment o‘tkazgani uchun malomatlarga qoldi. Bu haqda “ITAR-TASS” xabar berdi.
2012-yilda bir hafta davomida 689 ming nafar tarmoq foydalanuvchilari yangiliklar tasmasiga vaqti-vaqti bilan goh salbiy xususiyatga ega xabarlar bloki, goh faqat ijobiy xabarlar chiqa boshlagan.
Olingan xabarlarga bog‘liq ravishda foydalanuvchilar kayfiyatlari o‘zgarib turgan: yomon yangilikni olganlar salbiy xususiyatdagi status va izohlar yoza boshlagan, aksincha, yaxshi xabar o‘qiganlar ajoyib kayfiyatlarini namoyish etgan.
“Natija shuni ko‘rsatdiki, boshqa odamlarning hissiyotlari foydalanuvchilarga katta ta’sir o‘tkazadi”, — dedi tadqiqotchilardan biri. Eksperiment ustida tarmoq xodimlari, Kornell va Kaliforniya universitetlari vakillari ishlashdi.
Kuzatuvlar tarmoq sahifalarida olingan hissiyotlar internetdan chiqib ketgach ham foydalanuvchi va uning atrofidagilarga ta’sir qilishda davom etishini ko‘rsatdi.
Ushbu yangilik AQShdagi ilmiy markazlar va shaxsiy hayot himoyasi bilan shug‘ullanuvchi advokatlar e’tiboridan chetda qolmadi. Ba’zi psixologlar bunday tajribani “ta’qib qilish” deb atadi.
Facebook esa o‘z navbatida, tarmoq foydalanuvchilarning shaxsiy ma’lumotlariga tegmaganligini ta’kidladi.
Yuridik nuqtai nazardan Facebook hech qanday qonunni buzgani yo‘q. U hamma ko‘rishi mumkin bo‘lgan ma’lumotdan foydalangan xolos, deb yozadi “ITAR-TASS”.
Izoh (0)