Janobi Oliylari!
Rimga qaytganimdan so‘ng, 2014-yilning 5—6-iyun kunlari “O‘zbekistonda oziq-ovqat dasturini amalga oshirishning muhim zaxiralari” mavzusidagi xalqaro konferensiya munosabati bilan O‘zbekistonga tashrifim davomida ko‘rsatilgan hurmat-ehtirom va yuksak mehmondo‘stlik uchun Sizga chin dildan samimiy minnatdorlik izhor etish menga quvonch bag‘ishlaydi.
O‘zbekistonda Birlashgan Millatlar Tashkiloti Oziq-ovqat va qishloq xo‘jaligi tashkilotining (FAO) vakolatxonasi ochilishi to‘g‘risidagi bitimni tayyorlash jarayonidagi samarali hamkorlik uchun FAO tomonidan chuqur minnatdorlik bildiraman. Bu o‘zaro hamkorligimizni mustahkamlashga xizmat qiladi.
Siz bilan uchrashish, o‘zaro manfaatli masalalar, jumladan, oziq-ovqat xavfsizligi va sifatli ovqatlanish, shuningdek, mintaqaviy barqarorlik va xavfsizlikni ta’minlashga doir masalalarni muhokama etish imkoniyatiga ega bo‘lganimdan mamnunman. O‘zbekistonning oziq-ovqat mustaqilligini mustahkamlash borasidagi sa’y-harakatlari va mamlakatingizning qishloq xo‘jaligi va eksport sohasidagi ulkan salohiyati aholini yetarli miqdorda oziq-ovqat mahsulotlari bilan ta’minlash imkonini berayotganini alohida ta’kidlamoqchiman. Bu O‘zbekistonda sog‘lom va barkamol avlod kelajagining kafolatidir.
Siz konferensiyadagi nutqingizda eslatib o‘tgan taraqqiyotning O‘zbekistonga xos yo‘li — muhim besh tamoyilga asoslangan “o‘zbek modeli” haqida ma’lumot olganim men uchun g‘oyat foydali bo‘ldi. Tashrif davomida ushbu tamoyillar muvaffaqiyatli amalga oshirilayotgani bilan bevosita tanishish imkoniga ega bo‘lganimdan mamnunman.
O‘zbekistonning oziq-ovqat xavfsizligini ta’minlash, puxta o‘ylangan qishloq xo‘jaligi amaliyotini qo‘llash, iqtisodiyot va qishloq xo‘jaligini rivojlantirish borasidagi sa’y-harakatlarini FAO hamisha qo‘llab-quvvatlashga tayyor ekanini ta’kidlamoqchiman.
Sizga FAOni doimo qo‘llab-quvvatlab kelayotganingiz uchun minnatdorlik bildiraman. O‘zbekiston Respublikasi bilan FAO o‘rtasidagi mustahkam hamkorlik yanada keng rivojlanishiga qat’iy ishonaman.
Janobi Oliylari, samimiy minnatdorligim va chuqur hurmatimni qabul qilgaysiz.
Joze Gratsianu da SILVA, FAO Bosh direktori
Izoh (0)