Buxoro shahrida bo‘lib o‘tgan bo‘sh ish o‘rinlari yarmarkasida oliy o‘quv yurtlari va kasb-hunar kollejlari bitiruvchilari ishtirok etdi. Bu haqda O‘zA xabar berdi.
Shahar prokuraturasi, bandlikka ko‘maklashish va aholini ijtimoiy muhofaza qilish markazi tomonidan tashkil etilgan tadbirda 51 korxona, tashkilot va muassasa 586 bo‘sh ish o‘rni bilan qatnashdi.
– Men o‘tgan yili Buxoro muhandislik-texnologiya institutini bitirganman, – deydi Umidjon Bo‘ronov. – Yarmarkada mutaxassisligim bo‘yicha ish topdim. “Buxorodonmahsulotlari” aksiyadorlik jamiyatiga ishga kirish uchun yo‘llanma oldim.
Tadbir doirasida bank mutaxassislari bitiruvchilar hamda o‘z biznesini boshlash niyatida bo‘lgan yoshlarga imtiyozli kreditlar olish tartibi haqida batafsil ma’lumot berdi.
Buxoro shahar bandlikka ko‘maklashish va aholini ijtimoiy muhofaza qilish markazi rahbari Anvar Hamroyevning aytishicha, joriy yilning o‘tgan davrida hududda 5-marta mehnat yarmarkasi o‘tkazilib, 200 nafarga yaqin fuqaroga ishga yo‘llanma berilgan. Ularning aksariyati yoshlardir.
Izoh (0)