Andijon, Buxoro, Toshkent viloyatlari va Toshkent shahrida advokatlar noqonuniy pul olayotganida ushlandi.
Davlat xavfsizlik xizmatining Andijon viloyati bo‘yicha boshqarmasi tomonidan prokuratura va ichki ishlar organlari bilan hamkorlikda o‘tkazilgan tezkor tadbirda Bo‘ston tumanida faoliyat yurituvchi advokatlik byurosining advokat stajyori hamda 1984-yilda tug‘ilgan shaxs o‘zaro kelishgan holda, o‘zganing nomida bo‘lgan 34 sotix noturar yer maydonini kadastr tizimidagi tanishlari orqali xaridor nomiga turar joy sifatida rasmiylashtirib berish evaziga 34 ming dollar olgan vaqtlarida ashyoviy dalillar bilan ushlandi.
Boshqa holatda esa Toshkent shahridagi advokatlik firmasi advokati qurilish mahsulotlari ishlab chiqarish bilan shug‘ullanuvchi xo‘jalik yurituvchi subyektlarning mansabdor shaxslariga nisbatan Bektemir tuman prokuraturasi tomonidan Jinoyat kodeksining 184 va 189-moddalari bilan qo‘zg‘atilgan jinoyat ishi bo‘yicha 4 nafar fuqaroni javobgarlikka tortmaslik va qamoq ehtiyot chorasi qo‘llamaslik evaziga 25 ming dollar talab qilgan.
Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida Olmazor tumanida o‘tkazilgan tezkor tadbirda, ushbu pul mablag‘ini advokatning ko‘rsatmasiga asosan, uning 1987-yilda tug‘ilgan, muqaddam sudlangan tanishi olgan vaqtida ushlandi.
Buxoro viloyatida kuzatilgan holatda esa Peshku tumanida faoliyat yurituvchi advokatlik byurosi advokati 2024-yilda jinoyat ishlari bo‘yicha mazkur tuman sudi tomonidan sudlangan fuqaroga oid ishni kassatsiya instansiyasida ko‘rilishi jarayonida unga nisbatan oqlov hukmi chiqarish masalasini sud tizimidagi tanishlari orqali hal qilib berish evaziga 12 ming dollar olgan vaqtida DXX va Bosh prokuratura huzuridagi departament xodimlari tomonidan ashyoviy dalillar bilan ushlandi.
DXX Toshkent viloyati bo‘yicha boshqarmasi va Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda, Toshkent shahrida faoliyat yurituvchi advokatlik byurosining muqaddam sudlangan ishchisi Shayxontohur tuman Ichki ishlar organlari faoliyatini muvofiqlashtirish boshqarmasining Tergov bo‘limi ish yurituvida bo‘lgan, Jinoyat kodeksining 131-moddasi bilan poytaxtdagi SPA salonlardan birining boshqaruvchisiga nisbatan qo‘zg‘atilgan jinoyat ishini tanishlari orqali tergov jarayonida tugatishga ko‘maklashish evaziga o‘zining 1993-yilda tug‘ilgan tanishi orqali 10 ming dollar olgan vaqtida ushlandi.
Tergovga qadar tekshiruv davomida, advokatlik byurosi ishchisi ushbu masalani o‘zi ishlayotgan advokatlik byurosi advokati orqali hal qilib berishni rejalashtirgani aniqlanib, tezkor tadbir davom ettirildi va byuro advokati ham mazkur pul mablag‘ini olgan vaqtida ashyoviy dalillar bilan ushlandi.
Shuningdek, advokatlik byurosi ishchisi SPA salon boshqaruvchisidan muqaddam 4500 dollar olgani ham ma’lum bo‘ldi.
Hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Firibgarlik va pora uchun qo‘lga tushgan advokatlar
2025-yilning yanavrida Toshkent shahridagi advokatlik firmasi advokati 20 ming dollar olgan vaqtida ushlangandi. U 10 yilga ozodlikdan mahrum qilish jazosi bo‘yicha hozirda shahar sudining kassatsiya instansiyasida ko‘rilayotgan shikoyatni mansabdor tanishlari orqali ijobiy hal qilib berishni va’da qilgan.
2024-yilning martida Qoraqalpog‘istonda advokat giyohvandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish bilan ayblanayotgan shaxsga yengillik qilib berish evaziga sudyaga 10 ming dollar pora berayotganida qo‘lga tushgandi. O‘sha yilning aprelida Toshkentda muqaddam sudyalik qilgan advokat 75 ming dollar pora olayotganida ushlandi. Bu pulni qo‘shmachilik qilish yoki fohishaxona saqlash) va odam savdosi bilan sudlanib, 8 yil 6 oyga ozodlikdan mahrum qilingan va shaxsga nisbatan tayinlangan jazoni yengilroq jazo turiga almashtirib berish evaziga olgan.
Izoh (0)