Agar qo‘shnilar baland musiqa qo‘yib, dam olishingizga xalaqit qilsa yoki tunda bezovta qiluvchi shovqinlar tinmasa, bu kabi holatlarga nisbatan qat’iy choralar ko‘riladi. “Daryo” advokat Dilfuza Saidovadan shu holat bo‘yicha izoh oldi.
O‘zbekistonda “Aholini shovqinning zararli ta’siridan himoya qilish to‘g‘risida”gi qonun loyihasi ishlab chiqilgani haqida xabar berilgan edi. Ushbu hujjatda fuqarolarning osoyishtaligi va normal dam olishini buzuvchi harakatlarga qarshi keskin chora-tadbirlar, jarima miqdorlari va vaqt chegaralari aniq ko‘rsatib o‘tilgan. Unga ko‘ra, nafaqat tungi osoyishtalikni buzganlar, balki kunduzi me’yoridan ortiq shovqin qilganlar ham jazoga tortilishi mumkin.
Qachon shovqin qilish mumkin emas?
Qonunda shovqin keltirib chiqaradigan harakatlar va taqiqlangan vaqt oralig‘i aniq belgilab berilgan. Unga ko‘ra:
ish kunlari tungi vaqtda — 23:00 dan 06:00 gacha;
dam olish va bayram kunlari — 22:00 dan 09:00 gacha.
Bunday harakatlar qatoriga quyidagilar kiradi:
- baland ovozda qo‘shiq aytish yoki musiqa chalish,
- televizor yoki radiopriyomnikni baland ovozda qo‘yish,
- avtomobil signalidan keraksiz foydalanish,
- zarurat bo‘lmasa ta’mirlash ishlarini olib borish,
- va boshqa shovqinli ishlar.
“O‘zbekistonda kunduzgi vaqtda aholi yashash hududlarida shovqin ko‘targanlik uchun javobgarlik mavjud” — advokat Dilfuza Saidova.
— Ushbu holat uchun javobgarlik belgilangan. Turar joylarda va binolarda, aholi yashash hududlarida hamda dam olish zonalarida ruxsat etilgan shovqin darajasidan yuqori shovqin ko‘tarsangiz, javobgarlik mavjud. Bu O‘zbekiston Respublikasi Ma’muriy javobgarlik to‘g‘risidagi kodeksda tartibga solingan. Bu holat yuzasidan bazaviy hisoblash miqdorining uch baravari miqdorida jarimaga tortilishingiz mumkin.
Xo‘sh, shovqin soluvchi qo‘shniga qanday chora ko‘rish kerak?
— Avvalo og‘zaki ogohlantiring — ko‘p hollarda tushuntirish yetarli bo‘ladi. Yordam bermasa, 102 raqamiga murojaat qiling. Arizangizda vaqt, joy va shovqinning ta’sirini ko‘rsating. Holatni isbotlash uchun audio yoki video yozuv yozib olish zarar qilmaydi. Agar yo‘q bo‘lsa, qo‘ni-qo‘shni va jamoat joyidan so‘rab, aniqlashtiriladi.
Jarima qancha?
- Fuqarolar uchun — 3 dan 5 baravargacha BHM (ya’ni 1 020 000 so‘mdan 1 700 000 so‘mgacha);
- Mansabdor shaxslar uchun — 10 dan 15 baravargacha BHM (ya’ni 3 400 000 so‘mdan 5 100 000 so‘mgacha), deya tushuntirish berdi advokat.
Deputatlarning ta’kidlashicha, bu qonun aholining sog‘lig‘i, ruhiy osoyishtaligi va qulay yashash muhiti uchun zaruriy shart-sharoitlarni yaratish hamda har qanday zararli shovqinga qarshi samarali huquqiy mexanizmlarni joriy etish imkonini beradi.
Izoh (0)