Qirg‘izistonning Jalolobod viloyatida yana bir yerosti yo‘li topildi, u orqali odamlar va kontrabanda tovarlari O‘zbekiston hududiga noqonuniy olib o‘tilgan. Bu haqda Qirg‘iziston Ichki ishlar vazirligi xabar berdi.
Qayd etilishicha, 5-aprel kuni O‘sh viloyati IIB xodimlari tomonidan Qirg‘iziston chegarasini noqonuniy kesib o‘tgan O‘zbekiston fuqarosi 1984-yilda tug‘ilgan X.B.ni qo‘lga olingan. Tekshiruv davomida u Qirg‘izistonga ikki davlatni bog‘laydigan yashirin tunnel orqali qonuniy chegarani chetlab o‘tgani maʼlum bo‘lgan.
Politsiya Qirg‘iziston Jinoyat kodeksining 168-moddasi “Noqonuniy migratsiyani tashkil etish, migrantlarni noqonuniy olib kirish” moddasi bo‘yicha jinoyat ishi ochgan.
12-aprelga o‘tar kechasi o‘tkazilgan tezkor tadbirda Nooken tumanida mahalliy fuqaro qo‘lga olingan. U Qirg‘iziston—O‘zbekiston chegarasini noqonuniy kesib o‘tishni pul evaziga tashkil qilib kelgan. Shu bilan birga, chegarada noqonuniy ravishda tovarlar va odamlar noqonuniy olib o‘tiladigan quvur aniqlangan.
Politsiya maʼlumotlariga ko‘ra, qo‘lga olish chog‘ida gumonlanuvchidan maxsus belgili valyuta va tungi ko‘rish durbinlari musodara qilingan. Shuningdek, uning uyidan dastlabki qiymati qariyb 30 ming dollarga teng 87 quti narkotik modda topilgan.
Mart oxirlarida Jalolobod viloyatida yashovchi fuqaroning uyida Qirg‘iziston va O‘zbekistonni bog‘lovchi tunnel aniqlangani to‘g‘risida xabar berilgandi. Davlat xavfsizlik xizmatiga ko‘ra, ushbu tunnellardan mobil telefon va zargarlik buyumlari noqonuniy ravishda olib o‘tishda foydalanilgan.
Izoh (0)