Jalolobod viloyatida yashovchi fuqaroning uyida Qirg‘iziston va O‘zbekistonni bog‘lovchi tunnel aniqlangani to‘g‘risida xabar berilgandi. Davlat xavfsizlik xizmatiga ko‘ra, ushbu tunnellardan mobil telefon va zargarlik buyumlari noqonuniy ravishda olib o‘tishda foydalanilgan.
Qayd etilishicha, DXX Andijon viloyat bo‘yicha boshqarmasi xodimlari tomonidan olib borilgan tezkor-qidiruv tadbirlari natijasida, Xonobod shahrining “A.Navoiy” MFY hududini Qirg‘izistonning Jalolobod viloyati Suzoq tumani “Bekobod” qishlog‘i bilan bog‘lovchi 2 ta yashirin yerosti yo‘li aniqlanib, ular orqali tovar-moddiy boyliklarni yurtimizga olib o‘tish bilan shug‘ullangan O‘zbekiston va Qirg‘iziston fuqarolaridan iborat transchegaraviy jinoiy guruh faoliyatiga chek qo‘yilgan.
Dastlab Qirg‘iziston fuqarosi yerosti yo‘li orqali O‘zbekistonga 16 ta qopda jami 813 dona mobil telefon vositalarini olib o‘tib, mamlakatdan esa 1 kilogramm 745 gramm oltin yombilari va zargarlik buyumlarini olib chiqib ketmoqchi bo‘lgan vaqtida ashyoviy dalillar bilan qo‘lga olingan.
Tezkor tadbir davom ettirilib, uning Andijon shahridagi boshqa sheriklari aniqlandi hamda ularga tegishli 10 ta manzil ko‘zdan kechirilganida, mazkur yerosti yo‘laklari orqali olib o‘tilgan mobil telefon apparatlari, planshet, noutbuk va ularning aksessuarlari borligi aniqlanib, protsessual tartibda rasmiylashtirib olingan.
Har ikki yerosti yo‘li 20 metr chuqurlikda joylashgan, kengligi 70-80 santimetrni, balandligi 170-180 santimetr, birinchisining uzunligi 350 metrni, ikkinchisiniki esa 135 metrni tashkil qiladi.
Tezkor tadbir davomida, guruh aʼzolaridan dastlabki qiymati 11 milliard so‘mni tashkil qiluvchi jami 3813 dona turli mobil telefon apparatlari, 50 dona planshet, 97 dona noutbuk va 1000 donadan ortiq aksessuarlar, shuningdek 1 kilogramm 745 gramm oltin yombi va zargarlik buyumlari olindi.
Hozirda aniqlangan holat yuzasidan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)