Қирғизистоннинг Жалолобод вилоятида яна бир ерости йўли топилди, у орқали одамлар ва контрабанда товарлари Ўзбекистон ҳудудига ноқонуний олиб ўтилган. Бу ҳақда Қирғизистон Ички ишлар вазирлиги хабар берди.
![](/static/2024/Fozilbek/photo_2024-04-18_08-47-32.jpg)
Қайд этилишича, 5 апрель куни Ўш вилояти ИИБ ходимлари томонидан Қирғизистон чегарасини ноқонуний кесиб ўтган Ўзбекистон фуқароси 1984 йилда туғилган Х.Б.ни қўлга олинган. Текширув давомида у Қирғизистонга икки давлатни боғлайдиган яширин туннел орқали қонуний чегарани четлаб ўтгани маълум бўлган.
Полиция Қирғизистон Жиноят кодексининг 168-моддаси “Ноқонуний миграцияни ташкил этиш, мигрантларни ноқонуний олиб кириш” моддаси бўйича жиноят иши очган.
12 апрелга ўтар кечаси ўтказилган тезкор тадбирда Ноокен туманида маҳаллий фуқаро қўлга олинган. У Қирғизистон—Ўзбекистон чегарасини ноқонуний кесиб ўтишни пул эвазига ташкил қилиб келган. Шу билан бирга, чегарада ноқонуний равишда товарлар ва одамлар ноқонуний олиб ўтиладиган қувур аниқланган.
Полиция маълумотларига кўра, қўлга олиш чоғида гумонланувчидан махсус белгили валюта ва тунги кўриш дурбинлари мусодара қилинган. Шунингдек, унинг уйидан дастлабки қиймати қарийб 30 минг долларга тенг 87 қути наркотик модда топилган.
Март охирларида Жалолобод вилоятида яшовчи фуқаронинг уйида Қирғизистон ва Ўзбекистонни боғловчи туннел аниқлангани тўғрисида хабар берилганди. Давлат хавфсизлик хизматига кўра, ушбу туннеллардан мобил телефон ва заргарлик буюмлари ноқонуний равишда олиб ўтишда фойдаланилган.
Изоҳ (0)