Makroiqtisodiy va hududiy tadqiqotlar instituti mutaxassislari 2024-yilning mart oyida Toshkent shahrida taklif etilgan uy-joy ijara narxlarini tahlil qildi.
Qayd etilishicha, Toshkent shahrida ijara narxlari pasayishda davom etmoqda. 2024-yil mart oyida poytaxtda o‘rtacha taʼmirlangan turkumdagi xonadonlar ijara narxlarida fevral oyiga nisbatan o‘rtacha 0,61 foizga, to‘liq taʼmirlangan turkumdagi uy-joylar ijara narxlarida esa o‘rtacha 0,76 foizga tushish kuzatilgan.
O‘rtacha taʼmirlangan uy-joy ijarasi. 2024-yil mart oyida ushbu sinfdagi 1 xonali xonadonlar uchun taklif etilgan ijara narxi o‘tgan fevral oyiga nisbatan o‘rtacha 0,6 foizga pasayib, 391 dollarni tashkil etgan bo‘lsa, 2 xonali xonadonlar ijara narxi esa 1,2 foizga arzonlab, o‘rtacha 436 dollargacha tushgan. Shuningdek, o‘rtacha taʼmirlangan 3 va 4 xonali uylar ijara narxlari mos ravishda 0,2 foiz va 0,4 foizga pasayib, o‘rtacha narxlar 513-591 dollarni tashkil etgan.
O‘rtacha taʼmirlangan turkumdagi uylar uchun nisbatan arzon ijara narxlari Sergeli (1 xonali – 354 dollar, 2 xonali 386 dollar, 3 xonali 435 dollar, 4 xonali 441 dollar), Olmazor (1 xonali 359 dollar, 2 xonali 414 dollar, 3 xonali 454 dollar, 4 xonali 489 dollar) tumanlarida taklif etilgan bo‘lsa, ushbu turkumdagi eng qimmat ijara narxlari Mirobod (1 xonali 463 dollar, 2 xonali 518 dollar, 3 xonali 620 dollar, 4 xonali 819 dollar) va Shayxontohur (1 xonali 437 dollar, 2 xonali 456 dollar, 3 xonali 537 dollar, 4 xonali 624 dollar) tumanlarida kuzatilgan.
To‘liq taʼmirlangan uylar ijara narxlari. Mart oyida to‘liq taʼmirlangan 1 xonali uylar uchun o‘rtacha ijara narxi 472 dollarni tashkil etib, o‘tgan fevral oyiga nisbatan 0,8 foizga tushgan bo‘lsa, 2 xonali uylar uchun ushbu ko‘rsatkichlar mos ravishda 644 dollar va 1,1 foizni tashkil etgan. Shuningdek, 3 xonali uylar uchun taklif etilgan o‘rtacha ijara narxlarida (788 dollar) ham biroz (0,3 foiz) tushish kuzatilgan. Shuningdek, to‘liq taʼmirlangan 4 xonali uylar o‘rtacha ijara narxlari ham 0,9 foiz tushib, 909 dollargacha pasaygan.
To‘liq taʼmirlangan turkumdagi uylar uchun eng arzon ijara narxlari Sergeli (1 xonali 394 dollar, 2 xonali – 449 dollar, 3 xonali 556 dollar, 4 xonali 646 dollar) va Uchtepa (1 xonali 396 dollar, 2 xonali 496 dollar, 3 xonali 622 dollar, 4 xonali 646 dollar) tumanlarida hamda ushbu turkumdagi eng qimmat ijara narxlari Mirobod (1 xonali 567 dollar, 2 xonali 844 dollar, 3 xonali 1024 dollar, 4 xonali 1097 dollar) va Shayxontohur (1 xonali 556 dollar, 2 xonali 845 dollar, 3 xonali 1050 dollar, 4 xonali 1024 dollar) tumanlarida kuzatilgan.
Fevral oyida ko‘chmas mulk bozorida faollik biroz o‘sishidan so‘ng, mart oyida sezilarli pasayish qayd etilgandi. Poytaxtda ko‘chmas mulk bozori 20,7 foizga pasaygan. Ikkilamchi bozor pasayishni boshladi, oyiga o‘rtacha narx atigi 0,5 foizga oshgan.
Izoh (0)