Xabaringiz bor, O‘zbekistonda 68 nafar bolaning o‘limi va 16 nafar bolaning nogiron bo‘lib qolishiga sabab bo‘lgan “Dok-1 Maks” ishi bo‘yicha dastlabki hukmdan norozilarning sudga kiritgan apellyatsiyasiga ko‘ra, yana sud majlisi boshlangandi. Sudya Muzaffar Ahmedov raisligidagi sudlov hay’ati tomonidan ko‘rib chiqilayotgan ish 15-aprel kuni advokatlardan birining kelmagani bois yana qoldirilgandi.
Advokat Davron Ahmadov o‘tgan safargi sud majlisida videokonferensaloqa tizimi orqali sud majlisiga bog‘lanishga uringanini, biroq tizim ishlamaganini bildirdi. Advokatga ko‘ra, u sud majlisiga videokonferensaloqa orqali bog‘lanmoqchiligini aytgan. Ammo sudlov hay’ati yordamchisi bu haqda sudga ma’lum qilmagan. Shu sabab advokat sababsiz sudga kelmadi degan ma’lumot kiritilgan.
Meni sudga kelmadi deb, bayonnoma rasmiylashtirilgan. Qanday qilib men kelmay qolgan bo‘lishim mumkin? Sud kotibiga majlisga VKS orqali ishtirok etishimni aytgandim. Shu sabab sud hay’ati yordamchisini sud majlisi bayonnomasini soxtalashtirishda ayblab, jinoyat ishi ochish haqida prokuraturaga xabar berishni so‘rayman. Himoyam ostidagi sudlanuvchining himoya huquqi ta’minlanmagan, — dedi advokat.
Sudlov hay’ati bu iltimosnomani rad etdi.
Advokat shuningdek, sudlov hay’ati va sud kotibiga raddiya ham bildirdi.
Qolaversa, himoyachi sudlov hay’ati yordamchisi Davlat Olimovga intizomiy jazo berilishini so‘radi va bu haqda Jinoyat ishlari bo‘yicha Toshkent shahar sudi raisiga ma’lumot kiritilishini talab qildi. Sud iltimosnomalarni rad qildi.
Izoh (0)