Joriy yilda bo‘lib o‘tadigan Toshkent xalqaro investitsiya forumi uchun 17 milliard dollarlik shartnoma va bitimlar portfeli shakllantirilgan. Bu haqda Investitsiyalar, sanoat va savdo vazirligi departamenti direktori Akrom Aliyev ma’lum qildi, deb xabar beradi “Daryo” muxbiri.
2022-yilda o‘tkazilgan birinchi forumda 7,8 million dollarlik investitsion bitimlar imzolangan edi, ikkinchisida esa ushbu ko‘rsatkich 11 milliard dollardan oshdi. Joriy yilda investorlar bilan 17 milliard dollarlik portfel shakllantirilgan, — deydi u brifing davomida.
Aliyevning so‘zlariga ko‘ra, bu yilgi tadbirga qiziqish juda katta. “Forum oldingi ikkitasidan sezilarli darajada farq qiladi, hozirda buning uchun barcha ishni amalga oshirmoqdamiz. Shuningdek, iqtisodiyotimiz uchun muhim bo‘lgan yirik loyihalarni ishga tushirishga oid tadbirlar ham o‘tkaziladi”, — deydi departament direktori.
Yildan yilga forumdagi ishtirokchi davlatlar soni ortmoqda. Ishtirokchilar hukumatlarining qarashlarida ham o‘zgarish bo‘layotganini kuzatyapmiz: 78 davlatdan 100 ga yaqin yuqori martabali davlat arboblari ishtirok etishi kutilmoqda, — deydi Aliyev.
Joriy yilda Toshkent xalqaro investitsiya forumi 2—3-may kunlari Tashkent City’dagi Kongress-xollda bo‘lib o‘tadi.
Eslatib o‘tamiz, 2023-yil 27—28-aprel kunlari poytaxtda ikkinchi Toshkent xalqaro investitsiya forumi (TIIF-2023) bo‘lib o‘tgandi. Forum davomida O‘zbekiston va Markaziy Osiyoning investitsiyaviy salohiyatini atroflicha ochib berishga qaratilgan yalpi majlis, ekspertlarning 30 dan ortiq bahs-munozaralari, panel muloqotlari, davra suhbatlari va B2B muzokaralari o‘tkazilgan.
Izoh (0)