Жорий йилда бўлиб ўтадиган Тошкент халқаро инвестиция форуми учун 17 миллиард долларлик шартнома ва битимлар портфели шакллантирилган. Бу ҳақда Инвестициялар, саноат ва савдо вазирлиги департаменти директори Акром Алиев маълум қилди, деб хабар беради “Дарё” мухбири.
2022 йилда ўтказилган биринчи форумда 7,8 миллион долларлик инвестицион битимлар имзоланган эди, иккинчисида эса ушбу кўрсаткич 11 миллиард доллардан ошди. Жорий йилда инвесторлар билан 17 миллиард долларлик портфел шакллантирилган, — дейди у брифинг давомида.
Алиевнинг сўзларига кўра, бу йилги тадбирга қизиқиш жуда катта. “Форум олдинги иккитасидан сезиларли даражада фарқ қилади, ҳозирда бунинг учун барча ишни амалга оширмоқдамиз. Шунингдек, иқтисодиётимиз учун муҳим бўлган йирик лойиҳаларни ишга туширишга оид тадбирлар ҳам ўтказилади”, — дейди департамент директори.
Йилдан йилга форумдаги иштирокчи давлатлар сони ортмоқда. Иштирокчилар ҳукуматларининг қарашларида ҳам ўзгариш бўлаётганини кузатяпмиз: 78 давлатдан 100 га яқин юқори мартабали давлат арбоблари иштирок этиши кутилмоқда, — дейди Алиев.
Жорий йилда Тошкент халқаро инвестиция форуми 2—3 май кунлари Tashkent City’даги Конгресс-холлда бўлиб ўтади.
Эслатиб ўтамиз, 2023 йил 27—28 апрель кунлари пойтахтда иккинчи Тошкент халқаро инвестиция форуми (ТИИФ-2023) бўлиб ўтганди. Форум давомида Ўзбекистон ва Марказий Осиёнинг инвестициявий салоҳиятини атрофлича очиб беришга қаратилган ялпи мажлис, экспертларнинг 30 дан ортиқ баҳс-мунозаралари, панел мулоқотлари, давра суҳбатлари ва B2B музокаралари ўтказилган.
Изоҳ (0)