Andijonda tuman elektr ta’minoti korxonasi mas’ul shaxslariga jinoyat ishi qo‘zg‘atildi

Samarqand va Andijonda gaz va elektr energiyasidan noqonuniy foydalanish ortidan yana bir necha shaxsga jinoyat ishi qo‘zg‘atildi.

Bosh prokuratura huzuridagi departamentning Past Darg‘om tuman bo‘limi tomonidan IIB, “O‘zenergoinspeksiya” va GTF xodimlari bilan hamkorlikda o‘tkazilgan tergovga qadar tekshiruvda “Nayman” MFY hududidagi xonadonda yashovchi G‘.X. o‘ziga qarashli issiqxonaga hech qanday hujjatsiz tijorat maqsadida 20 dona qo‘lbola usulda yasalgan isitish uskunalarini o‘zboshimchalik bilan o‘rnatib, jami 688,9 million so‘mlik tabiiy gazdan noqonuniy foydalangani aniqlangan.

Shu kabi, “Qozoq-Nayman” mahallasi hududidagi xonadonda yashovchi X.SH. o‘ziga tegishli issiqxonada qo‘lbola usulda yasalgan isitish uskunalarini o‘rnatib, 329,6 million so‘mlik tabiiy gazdan noqonuniy foydalangani aniqlangan.

Departamentning Bo‘ston tuman bo‘limi tomonidan ETK xodimlari bilan hamkorlikda o‘tkazilgan tadbirda “T-I.” MCHJ mas’ul shaxslari tuman elektr ta’minoti korxonasi mas’ul shaxslari bilan o‘zaro til biriktirib, MCHJga qarashli binoda nazorat muhri bo‘lmagan elektr hisoblagichni o‘rnatib, jami 105,2 million so‘mlik elektr energiyasidan noqonuniy foydalangani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.