Ijtimoiy tarmoqlarda Samarqand viloyatidagi maktablarning birida o‘quvchining onasi o‘qituvchiga qo‘l ko‘targani aks etgan video tarqaldi. Holat yuzasidan Maktabgacha va maktab ta’limi boshqarmasi ma’lumot berdi.
Unda aytilishicha, mazkur holat Kattaqo‘rg‘on tumani 93-umumta’lim maktabida 17-mart kuni soat 10:47 larda sodir bo‘lgan. Ayni paytda holat huquqni muhofaza qilish idoralari tomonidan o‘rganilmoqda.
O‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Alohida taʼkidlash kerakki, pedagog buzilgan huquqlari yuzasidan moddiy va maʼnaviy zarar undirish uchun fuqarolik sudlariga ham murojaat qilishga haqli.
Pedagog faoliyatiga aralashish taqiqlanadi
Sirdaryodagi voqeadan keyin maktabgacha va maktab taʼlimi vaziri Hilola Umarova bu kabi holatlar yuz berganda o‘qituvchi-pedagoglarimizni himoya qilish uchun kerakli yuridik, ijtimoiy, psixologik yordam berilishi maʼlum qildi.
Shuni tushunib olishimiz kerakki, maktabga duch kelgan odam (dars vaqtida hatto ota-ona ham) istaganicha kirib-chiqish, dars jarayoni va pedagoglar faoliyatiga aralashish, o‘qituvchiga do‘q qilish u yoqda tursin, madaniyat chegarasidan chetga chiqib gaplashishga haqli emas. Bunday holatlar aniqlansa vazirlik zudlik bilan huquq-tartibot idoralariga murojaat qiladi!, deydi vazir.
Hilola Umarova o‘z chiqishida qonunchilikka muvofiq “pedagogning huquqlari, shaʼni, qadr-qimmati va ishchanlik obro‘si davlat himoyasi ostida bo‘lishi”ni alohida taʼkidlab o‘tgan.
Vazirlik axborot xizmati rahbarining “Daryo”ga maʼlum qilishicha, o‘qituvchining kasbiy faoliyati amalga oshirilishini taʼminlashda aralashish mumkin emas. Yaʼni:
- kasbiy faoliyatiga aralashish;
- faoliyatini asossiz ravishda tekshirish;
- pedagog tomonidan taʼlim oluvchilarning bilimlarini to‘g‘ri va xolis baholashga taʼsir ko‘rsatish;
- unga o‘z xizmat majburiyatlarini bajarishga to‘sqinlik qilish taqiqlanadi.
Matbuot kotibining tushuntirishicha, pedagogning kasbiy faoliyatiga qonunga xilof ravishda aralashish yoki uning o‘z xizmat majburiyatlarini bajarishiga to‘sqinlik qilish qonunda belgilangan tartibda javobgarlikka sabab bo‘ladi.
Pedagogning huquqlari ham qonunda qatʼiy belgilab o‘tilgan. Yaʼni o‘z kasbiy faoliyatiga g‘ayriqonuniy ravishda aralashuvdan himoyalanadi. Pedagogik faoliyati davomida o‘ziga biriktirilgan sinfdagi (guruhdagi, kursdagi) taʼlim oluvchilarning bilimini mustaqil baholaydi.
Taʼlim oluvchilar va ularning ota-onalari (qonuniy vakillari) tomonidan pedagogning kasbiga hurmat bilan munosabatda bo‘lishni talab qilish ham man etilgan.
Pedagog o‘zining kasbiy faoliyatini amalga oshirish davomida o‘z shaʼni, qadr-qimmati va ishchanlik obro‘sini himoya qilish uchun sudga daʼvo arizasi bilan murojaat qilgan, shuningdek o‘z huquqlarini buzayotgan davlat organlarining g‘ayriqonuniy qarorlari, ular mansabdor shaxslarining harakatlari (harakatsizligi) ustidan shikoyat qilgan taqdirda davlat bojini to‘lashdan ozod qilinadi, — deydi Dilfuza Sobirova.
Izoh (0)