Statistik raqamlarga ko‘ra, o‘zbekistonliklar orasida xorijga doimiy yashash uchun ko‘chib ketishlar soni kamayib bormoqda. Masalan, 2010-yilda mamlakatdan qariyb 44 420 kishi chet elga ko‘chgan. Oradan bir yil o‘tib (2011-yilda), bu raqam yanada kattalashgan va 50 816 nafarga yetgan.
2015-yilgacha chet elga ko‘chganlar soni 30 000 nafardan ortiq bo‘lgan. Raqamlar quyidagicha:
- 2012-yilda — 45 447 kishi;
- 2013-yilda — 38 589 kishi;
- 2014-yilda — 42 228 kishi;
- 2015-yilda 31 765 kishi O‘zbekistondan xorijga ko‘chib ketgan.
Keyingi davrda mazkur ko‘rsatkich kamayib borganini ko‘rish mumkin.
- 2016-yilda — 28 069 kishi;
- 2017-yilda — 20 772 kishi;
- 2018-yilda — 19 006 kishi;
- 2019-yilda — 13 229 kishi;
- 2020-yilda — 13 648 kishi chet davlatlarga doimiy yashash istagida ko‘chgan.
Tahlillarga qaraganda, O‘zbekistondan ko‘chib ketayotganlarning asosiy qismi Rossiya va Qozog‘istonga yo‘l olgan. Misol uchun, 2021-yilda 20 140 kishi chet mamlakatlarga ko‘chgan. Shundan 56,6 foizi Qozog‘istonga, 30,5 foizi Rossiyaga ketgan.
So‘ngi 15 yil ichida xorijga doimiy yashash uchun eng kam ko‘chishlar 2022-yilda yuz bergan — 8 790 kishi. Shundan erkaklar 4 100 nafarni, ayollar 4 790 nafarni tashkil etgan. Ko‘chganlardan 6 985 nafari Qozog‘istonga (79,5 foiz), 1 441 nafari Rossiyaga (16,4 foiz) borgan.
2023-yilda 17 336 nafar, 2024-yilda 10 842 nafar o‘zbekistonlik xorijga doimiy istiqomat qilish uchun ko‘chgan. O‘tgan yili chetga ko‘chganlarning asosiy qismi — 81,1 foizi Qozog‘iston, 14,8 foizi Rossiya, 0,9 foizi Janubiy Koreya va 0,7 foizi Qirg‘iziston hissasiga to‘g‘ri kelgan. Ularning 12 foizi mehnatga layoqatli yoshdan kichiklar, 80 foizi mehnatga layoqatli yoshdagilar va 8 foizi mehnatga layoqatli yoshdan kattalar bo‘lgan.
Yilma-yil hisoblaganda oxirgi 15 yil ichida 405 ming nafardan ortiq O‘zbekiston fuqarolari xorijiy davlatlarga doimiy yashash maqsadida ko‘chib ketganini ko‘rish mumkin.
Izoh (0)