Статистик рақамларга кўра, ўзбекистонликлар орасида хорижга доимий яшаш учун кўчиб кетишлар сони камайиб бормоқда. Масалан, 2010 йилда мамлакатдан қарийб 44 420 киши чет элга кўчган. Орадан бир йил ўтиб (2011 йилда), бу рақам янада катталашган ва 50 816 нафарга етган.
2015 йилгача чет элга кўчганлар сони 30 000 нафардан ортиқ бўлган. Рақамлар қуйидагича:
- 2012 йилда — 45 447 киши;
- 2013 йилда — 38 589 киши;
- 2014 йилда — 42 228 киши;
- 2015 йилда 31 765 киши Ўзбекистондан хорижга кўчиб кетган.
Кейинги даврда мазкур кўрсаткич камайиб борганини кўриш мумкин.
- 2016 йилда — 28 069 киши;
- 2017 йилда — 20 772 киши;
- 2018 йилда — 19 006 киши;
- 2019 йилда — 13 229 киши;
- 2020 йилда — 13 648 киши чет давлатларга доимий яшаш истагида кўчган.
Таҳлилларга қараганда, Ўзбекистондан кўчиб кетаётганларнинг асосий қисми Россия ва Қозоғистонга йўл олган. Мисол учун, 2021 йилда 20 140 киши чет мамлакатларга кўчган. Шундан 56,6 фоизи Қозоғистонга, 30,5 фоизи Россияга кетган.
Сўнги 15 йил ичида хорижга доимий яшаш учун энг кам кўчишлар 2022 йилда юз берган — 8 790 киши. Шундан эркаклар 4 100 нафарни, аёллар 4 790 нафарни ташкил этган. Кўчганлардан 6 985 нафари Қозоғистонга (79,5 фоиз), 1 441 нафари Россияга (16,4 фоиз) борган.
2023 йилда 17 336 нафар, 2024 йилда 10 842 нафар ўзбекистонлик хорижга доимий истиқомат қилиш учун кўчган. Ўтган йили четга кўчганларнинг асосий қисми — 81,1 фоизи Қозоғистон, 14,8 фоизи Россия, 0,9 фоизи Жанубий Корея ва 0,7 фоизи Қирғизистон ҳиссасига тўғри келган. Уларнинг 12 фоизи меҳнатга лаёқатли ёшдан кичиклар, 80 фоизи меҳнатга лаёқатли ёшдагилар ва 8 фоизи меҳнатга лаёқатли ёшдан катталар бўлган.
Йилма йил ҳисоблаганда охирги 15 йил ичида 405 минг нафардан ортиқ Ўзбекистон фуқаролари хорижий давлатларга доимий яшаш мақсадида кўчиб кетганини кўриш мумкин.
Изоҳ (0)