Shavkat Mirziyoyevning Fransiyaga davlat tashrifi davomida energetika masalalari muhokamada asosiy o‘rinni egallaydi. Bu haqda davlat rahbarining Fransiyaga tashrifi arafasida mamlakatning eng yirik va nufuzli nashrlaridan biri — Le Figaro nashri xabar berdi.
Negaki, Fransiya O‘zbekiston va Markaziy Osiyoning salohiyatiga katta qiziqish bildiradi, bunda Niger Orano kompaniyasi faoliyatiga chek qo‘yish bilan tahdid qilayotgan sharoitda uran zaxiralari qiziqishning muhim sabablardan biridir, deyiladi maqolada.
Shuningdek, iqtisodiy (yillik o‘sish 6 foiz) va demografik (35 million kishilik aholi yiliga 600 mingga ko‘paymoqda) o‘sish davrini boshdan kechirayotgan O‘zbekistonda geosiyosiy beqarorlik fonida energiya balansini diversifikatsiya qilish zaruriyati yuzaga kelgani ham qiziqish sabablaridan biri sifatida keltirilgan.
Bu borada Rossiya, Xitoy, Osiyo, Fors ko‘rfazidagi va g‘arb mamlakatlari kompaniyalari qatorida Fransiya kompaniyalari hamkorlikka taklif qilinmoqda.
Fransiya bilan munosabatlarda biz uchun muhim narsa shundaki, ular to‘liq energiya balansiga ega va uni qanday boshqarishni biladi, deb qayd etgan energetika vaziri Jo‘rabek Mirzamahmudov Le Figaro nashriga bergan intervyusida.
Nashrning qayd etishicha, buni Toshkentdagi Fransiya ishbilarmon doiralari vakillari ham tasdiqlaydi.
“Fransiyada energiyaning barcha turlari bo‘yicha barcha ishlab chiqarish jarayonlari borasida tajriba va nou-xau bilan ta’minlash uchun bir qancha ajoyib imkoniyatlar bor”, degan “O‘zbekiston—Fransiya” iqtisodiy palatasi prezidenti Joanna Golas.
Maqolada O‘zbekistonda bir necha yil avval gaz energiya balansining 85 foizini tashkil qilgani, ammo hozirda gaz zaxiralari kamayib borayotgani, unga talab esa tez o‘sib borayotgani qayd etilgan.
Ayni paytda ilg‘or texnologiyalarni qo‘llash orqali tabiiy gazdan samaraliroq foydalanish maqsad qilingani, EDF (Fransiyaning elektroenergiya bo‘yicha davlat kompaniyasi — Électricité de France) ham aynan shuni ko‘zlab har biri 1600 megavatt quvvatga ega gazda ishlaydigan kombinatsiyalangan elektr stansiyalarini qurish bo‘yicha ikkita loyihani amalga oshirayotgani ta’kidlangan.
Qayta tiklanuvchi energiya borasida ham Fransiyaning TotalEnergies, Voltalia kabi kompaniyalari O‘zbekistonda loyihalarni amalga oshirayotgani qayd etib o‘tilgan.
Maqolada O‘zbekistonda atom elektrostansiyasini qurish rejalashtirilganiga ham to‘xtalib o‘tilgan.
Ushbu loyiha uchun Fransiya, albatta, bizga eng yaxshi yechim va yordamni taqdim eta oladigan davlatdir, degan Atom energetikasini rivojlantirish agentligi direktori Azim Ahmedxo‘jayev.
Uning ta’kidlashicha, bu borada Fransiyaning bir necha kompaniyalari bilan, jumladan, texnik hamkor sifatida Assystem bilan, o‘rganish uchun Bureau Veritas bilan, elektr stansiyalarini texnik boshqarish uchun yaxshi yechimlarga ega Framatome bilan muzokaralar olib borilmoqda.
Fransiya tomoni Markaziy Osiyoning markazida yanada samarali faoliyat yuritish uchun O‘zbekistonda texnik mutaxassislar va menejerlarini tayyorlashga o‘z hissasini qo‘shmoqchi. Bu borada sentyabr yoki oktyabr oylarida hamkorlikda universitet ochilishi kutilmoqda.
Shavkat Mirziyoyev Fransiyada 11—13-mart kunlari davlat tashrifi bilan bo‘ladi. Parij shahrida oliy darajadagi muzokara va tadbirlar, Fransiyaning rasmiy va ishbilarmon doiralari bilan qator uchrashuvlar o‘tkazilishi rejalashtirilgan. Davlat rahbari Fransiyaga bundan avval 2018 va 2022-yillarda tashrif buyurgan. Fransiya rahbari Emmanuel Makron O‘zbekistonga rasmiy tashrif bilan 2023-yilda kelgan.
Izoh (0)