Bolalar ombudsmani ijtimoiy tarmoqlarda Qashqadaryoda maktab o‘quvchisining unashtiruv marosimi o‘tkazilayotgani aytilgan xabarlar yuzasidan ma’lumot berdi.
Qayd etilishicha, holat Bolalar ombudsmani tomonidan Ichki ishlar organlari bilan birgalikda o‘rganilgan. Aniqlanishicha, bu unashtiruv marosimi Qashqadaryo viloyati Ko‘kdala tumani “Tuxmor” qishlog‘ida yashovchi, 2003-yilda tug‘ilgan (voyaga yetgan) B.G. ga tegishli bo‘lib, qizning o‘zi tushuntirish berishicha, marosim uning xohishiga zid bo‘lmagan holda o‘tkazilgan.
Shu bilan birga, Bolalar ombudsmani respublikaning mazkur hududida qizlarni erta turmushga uzatish urf-odati hali ham saqlanib qolayotganiga urg‘u berib, qizlarning maktabdan keyin taʼlim olishi uchun imkoniyatlarni yanada manzilli ravishda kengaytirishga alohida eʼtibor qaratilishi va bu borada mutasaddilar tizimli choralar ko‘rib borishi zarurligini taʼkidlagan.
Yanvar o‘rtalarida Qashqadaryoda o‘z roziligisiz, ota-onasi tomonidan unashtirilgan qiz murojaat bilan chiqqandi. Undan oldinroq esa shu viloyatda 17 yoshli o‘quvchi qizning to‘yi to‘xtatilgan edi.
Izoh (0)