Andijon viloyatida shifokorlarning noto‘g‘ri tashxisi tufayli homilador ayol vafot etdi. Kun.uz saytining yozishicha, Andijon shahar perinatal markaziga ko‘richak bilan og‘rib murojaat qilgan 26 yoshli homilador ayolni shifokorlar to‘lg‘oq keltiruvchi ukol yordamida tug‘dirib olishgan. Shifokorlardan biri uning turmush o‘rtog‘iga ayolida kuchli sehr borligini, tezda chalpak va holvaytar qilib tarqatmasa, ayoli o‘lishi mumkinligini aytgan. Ayolning yaqinlari shundan keyin uning ahvoli yomonlashgani va ko‘richak yorilishi oqibatida vafot etganini aytyapti.
SSV holat yuzasidan ma’lumot berdi. Qayd etilishicha, shundan so‘ng mazkur holat to‘liq nazoratga olinib, vaziyatga aniqlik kiritish maqsadida maxsus ishchi guruh tomonidan tezkor o‘rganish ishlari o‘tkazildi.
Yo‘l qo‘yilgan xato va kamchiliklarga huquqiy baho berish taqozo qilingani sababli ekspertlarning dastlabki xulosalari hamda tegishli hujjatlar prokuratura organlariga taqdim etildi. Ayni paytda holat yuzasidan tergovga qadar surishtiruv ishlari olib borilyapti.
Bundan avval Toshkent viloyatida homilador ayol antibiotik sabab vafot etgani haqida xabar berilgandi. Shuningdek, Toshkent viloyati, Ohangaron shahrida homilador ayol qornidagi homilasi bilan vafot etgandi. Bemorning o‘limiga yurak ishemik kasalligi, o‘tkir koronar yetishmovchiligi, yurak mushaklarining gipertrofiyasi va o‘tkir miokard infarkti sabab bo‘lgan.
Izoh (0)