Ijtimoiy tarmoqlarda Toshkent viloyati, Ohangaron shahrida homilador ayol qornidagi homilasi bilan vafot etgani haqida xabarlar tarqalgan edi. Marhumaning turmush o‘rtog‘i voqea haqida gapirib berdi.
2024-yilning 3-aprel kuni soat 02:45 da 1992-yil Ohangaron shahrida tug‘ilgan X.A. qorin va beldagi og‘riq bilan Ohangaron shahar tibbiyot birlashmasi tug‘uruq bo‘limiga “Homiladorlik 4, 39 hafta tug‘uruq 3. Tug‘uruqning 1 davri, latent fazasi. Semizlik III daraja” tashxisi bilan qabul qilingan. Bemor shifokorlar nazorati ostida bo‘lgan.
4-aprel kuni soat 14:10 da ayolning to‘satdan ahvoli og‘irlashib, havo yetishmasligi va yurak sohasida og‘riq bilan nafas olishi qiyinlashgan. Shundan so‘ng zudlik bilan reanimatolog chaqirtirilib, bemorda zarur reanimatsion choralar amalga oshirilgan.
Biroq shunga qaramay, 14:35 da ayolda biologik o‘lim holati kuzatilgan.
Sud-tibbiy ekspertizasining dastlabki xulosasiga ko‘ra, bemorning o‘limiga yurak ishemik kasalligi, o‘tkir koronar yetishmovchiligi, yurak mushaklarining gipertrofiyasi va o‘tkir miokard infarkti sabab bo‘lgan.
Asorati: o‘tkir yurak va nafas yetishmovchiligi. O‘pka va bosh miya shishi.
Yondosh: Homiladorlik 4, tug‘uruq 3, homiladorlik 39-40 hafta. Bachadon shilliq qavatlariga qon quyilishi. Semizlik 3 daraja. Splenomegaliya. O‘tkir jigar gepatozi. Bachadonda jinsi erkak homila. Homila ichi asfiksiyasi. Homila antenatal o‘limi.
Marhumaning eri ayolida hech qanday nuqson bo‘lmaganini, shifoxonaga ham o‘zi bilan birga borganini aytmoqda.
“2015-yil turmush qurganmiz, ikki farzandimiz bor. 3-farzandni rejalashtirib, to‘lg‘oq kelganda shifoxonaga birga bordik. Hammasi yaxshi deyishdi. Telefonda gaplashganimizda ham o‘zini yaxshi his qilayotganini aytdi, dori kerak, dedi. Osma ukol qilsa to‘lg‘oq tezlashar ekan, dedi. Qaynonam telefon qilib, qizi telefonni ko‘tarmayotganini aytdi. Ishonch bilan ichkariga kirdim. Vrachga ayolimni chaqirib berishini iltimos qildim. Kirib ketib, eshikni qulflab oldi. Yuragim juda tez urdi. Tashqariga chiqib arqondan osilib xonasiga chiqsam, deraza ochiq ekan. Kirganimda ayolim sochig‘i bilan yopib qo‘yilgan ekan. O‘lmagan deb o‘ylayapman. Tug‘ruqxonadagilar yuragida nuqsoni bo‘lgan, deyishdi. Ayolimda hech qanday nuqson bo‘lmagan. Ayolimga beeʼtibor bo‘lganlarga chora ko‘rilishini xohlayman”, — deydi marhumaning eri.
Bosh prokuratura matbuot xizmatining xabar berishicha, holat yuzasidan prokuratura tomonidan tergovga qadar tekshirish harakatlari olib borilmoqda.
“Tekshirish harakatlari har tomonlama, to‘liq va xolisona o‘tkazilishi va natijasi bo‘yicha qonuniy qaror qabul qilinishi taʼminlanadi”, — deyiladi xabarda.
Izoh (0)