Андижон вилоятида шифокорларнинг нотўғри ташхиси туфайли ҳомиладор аёл вафот этди. Kun.uz сайтининг ёзишича, Андижон шаҳар перинатал марказига кўричак билан оғриб мурожаат қилган 26 ёшли ҳомиладор аёлни шифокорлар тўлғоқ келтирувчи укол ёрдамида туғдириб олишган. Шифокорлардан бири унинг турмуш ўртоғига аёлида кучли сеҳр борлигини, тезда чалпак ва ҳолвайтар қилиб тарқатмаса, аёли ўлиши мумкинлигини айтган. Аёлнинг яқинлари шундан кейин унинг аҳволи ёмонлашгани ва кўричак ёрилиши оқибатида вафот этганини айтяпти.
ССВ ҳолат юзасидан маълумот берди. Қайд этилишича, шундан сўнг мазкур ҳолат тўлиқ назоратга олиниб, вазиятга аниқлик киритиш мақсадида махсус ишчи гуруҳ томонидан тезкор ўрганиш ишлари ўтказилди.
Йўл қўйилган хато ва камчиликларга ҳуқуқий баҳо бериш тақозо қилингани сабабли экспертларнинг дастлабки хулосалари ҳамда тегишли ҳужжатлар прокуратура органларига тақдим этилди. Айни пайтда ҳолат юзасидан терговга қадар суриштирув ишлари олиб бориляпти.
Бундан аввал Тошкент вилоятида ҳомиладор аёл антибиотик сабаб вафот этгани ҳақида хабар берилганди. Шунингдек, Тошкент вилояти, Оҳангарон шаҳрида ҳомиладор аёл қорнидаги ҳомиласи билан вафот этганди. Беморнинг ўлимига юрак ишемик касаллиги, ўткир коронар етишмовчилиги, юрак мушакларининг гипертрофияси ва ўткир миокард инфаркти сабаб бўлган.
Изоҳ (0)