Toshkent viloyati Bo‘stonliq tumanida homilador ayol antibiotik sabab vafot etgani haqida “Millar” dasturida xabar berildi.
Maʼlum qilinishicha, voqea 15-aprel kuni sodir bo‘lgan. Marhumaning eri holat haqida gapirib berdi.
“2023-yil 24-avgustda oila qurganmiz. Ayolim homilador bo‘ldi. 13-aprel kuni markaziy shifoxonaga bordik. Ginekolog ayolimni ko‘rib, qo‘lida ozgina shishish borligini, “soxraneniya”ga olish kerakligini aytdi. Men ishlarim bilan shaharga ketdim. Allergiyang borligini ular ham biladimi, desam, ha, dedi. Tibbiyot daftarida allergiya beradigan dorilar mutlaqo qilinmasin, deb yozilgan. Shunga qaramasdan, allergiya beradigan dorini ayolimga yozib berishgan. Pulsi tushib ketgach, tinchlantiradigan dori qilishgan. Qornidagi 7,5 oylik bola nobud bo‘lgan. Ayolim ikki kundan oshiq komada yotdi. “Obed”da o‘g‘limni ko‘mib keldim, kechki payt ayolimni ham ekspertizadan olib, kechasi ko‘mib keldim. Reanimatsiyada ayolimning yonida turib, unga yoqadigan gaplarimni aytdim. Baribir qo‘limda jon berdi”, — deydi marhumaning eri.
Viloyat prokuraturasiga ko‘ra, 1995-yilda tug‘ilgan ayol vafot etgani holati yuzasidan tuman prokuraturasi tomonidan tergovga qadar tekshiruv harakatlari olib borilmoqda.
Izoh (0)