Toshkent viloyatida ikki nafar qiz suv omboriga cho‘kib ketdi

Toshkent viloyatida Ohangaron tumani “Chinor” MFY hududidagi Ohangaron suv omborida ikki nafar qiz cho‘kib ketdi.

Bosh prokuratura axborot xizmati rahbari Hayot Shamsutdinovning “Daryo”ga ma’lum qilishicha, 28-iyul kuni uch nafar qiz — Angren shahrida tug‘ilgan 19 yoshli D.P., 16 yoshli D.A. va Ohangaron tumanida tug‘ilgan 18 yoshli N.E. Ohangaron suv omboriga cho‘milish maqsadida kelgan. Ulardan ikki nafari suvdan qaytib chiqmasdan, bedarak yo‘qolgan.

Cho‘kib ketgan ikki nafar qizning murdasi FVV Ohangaron tuman bo‘limi xodimlari tomonidan olib borilgan qidiruv ishlari davomida 28 va 29-iyul kunlari topilgan. 16 yoshli D.A. qutqarib qolingan.

Qizlarning suvga cho‘kib vafot etgani yuzasidan o‘lim sabablarini aniqlash uchun sudga oid tibbiy ekspertizalari tayinlangan. Hozirda tuman prokuraturasi tomonidan mazkur holat yuzasidan tergovga qadar tekshiruv harakatlari olib borilmoqda.

23-iyul kuni Qoraqalpog‘istonning Ellikqal’a tumanidagi Aqchako‘l suv havzasida bir oilaning 3 nafar a’zosi vafot etgandi. 36 yoshli ayol va uning 12 va 10 yoshdagi qizlari halok bo‘lgan. Shu kuni Namanganda ikki o‘smir kanalda cho‘kib ketdi. 31-iyulda esa Toshkentdagi “Yangi O‘zbekiston” bog‘ida joylashgan dam olish maskanida cho‘milayotgan 23 yoshli yigit cho‘kib ketgandi.