Марказий Осиёдан келган мигрантларга Россия фуқаролигини беришга вақтинчалик мораторий жорий этиш таклиф қилинди. Бу ҳақда “Адолатли Россия – ҳақиқат учун” фракцияси раҳбари Сергей Миронов ижтимоий тармоқлардаги саҳифасида ёзди.
Парламент аъзоси “Адолатли Россия - Ҳақиқат учун” 2022 йилда ҳам худди шундай ташаббус билан чиққанини эслатди. Ҳозирда миграция муаммолари кескинлашган пайтда, бу масалани кўриб чиқишга қайтиш керак, деб ҳисоблайди у.
Мироновнинг сўзларига кўра, давлат “гастарбайтерларни оммавий паспортлаштириш”га қарши туриши ва миллий хавфсизлик соҳасидаги ўз манфаатларини ҳимоя қилиши керак.
“Бунинг учун Марказий Осиё мамлакатлари аҳолисига Россия фуқаролигини беришга мораторий жорий қилиш зарур. Ҳеч бўлмаганда 2026 йилгача. Ва бу вақт ичида қонунчиликни тартибга солиш, миграция хизматини ислоҳ қилиш, уни порахўрлардан тозалаш, шунингдек, аввал берилган паспортларнинг қонунийлигини текшириш мумкин”, — дея хулоса қилди депутат.
Аввалроқ Федерация Кенгаши вице-спикери Константин Косачев хорижлик журналистлар билан учрашувда расмийлар миграция қонунчилигини такомиллаштиришда камситувчи қарорларга йўл қўймаслигини айтган эди.
Кеча 3 август куни Москва яқинида ўтказилган рейддан сўнг МДҲ давлатлари ва Африкадан келган 120 нафар муҳожир Россиядан чиқариб юборилиши ҳақида хабар берилган эди. Улардан 45 нафари Ўзбекистон фуқаролари экани маълум қилинган.
Изоҳ (0)