Pokistonda 14-avgust kuni Mustaqillik kuni nishonlanib, havoga o‘q uzilishi va mushakbozlik oqibatida 3 kishi, jumladan, 7 yoshli qizcha halok bo‘ldi, yana 109 nafar odam jarohatlandi. Bu haqda The India Times xabar berdi.
Hodisa 14-avgust kuni Karachining turli hududlarida yuz bergan. Xususan, Azizobod okrugida 7 yoshli qizga osmonga otilgan o‘qlardan biri kelib tushgan, u voqea joyida vafot etgan. Korangi tumanida 35 yoshli erkak, Kalrida esa 70 yoshli kishi uyining tashqarisida o‘q tegib, halok bo‘lgan.
Turli manbalarga ko‘ra, birgina Karachining o‘zida 109 nafar odam o‘qdan jarohatlangan. Yaradorlar shahar shifoxonalari va xususiy klinikalarga joylashtirilgan. Politsiya reydlar davomida 33 nafar gumonlanuvchini qo‘lga olgan va ulardan zamonaviy qurollar hamda o‘q-dorilarni musodara qilgan. Ushbu hodisalar bo‘yicha jinoyat ishlari ochilgan.
Pokistonda deyarli har yili Mustaqillik kuni shunday fojialar bilan yakunlanadi. 2024-yilda bunday otishmalarda 95 kishi yaralangan, bu ko‘rsatkich o‘tgan yildagidan (80 kishi) yuqori. Mamlakat 1947-yil 14-avgustda Britaniya mustamlakasidan ozod bo‘lgan. Shu kundan buyon Pokiston har yili Mustaqillik kunini harbiy paradlar va madaniy tadbirlar bilan nishonlab keladi.
Izoh (0)