Kolumbiyada yangi tug‘ilgan qizaloqqa ChatGPT sharafiga ism berildi

Kolumbiyaning Serete shahrida oila yangi tug‘ilgan qiziga ChatGPT chatboti sharafiga Chat Yipiti deb ism qo‘ydi. Bu haqda UPI xabar qilmoqda.

 

Kordova departamentining kichik Serete shahrida kolumbiyalik oila yangi tug‘ilgan chaqalog‘iga mashhur ChatGPT dasturi sharafiga Chat Yipiti Bastidas Gerra deb ism qo‘yib, qizg‘in muhokamalarga sabab bo‘ldi.

Mahalliy ommaviy axborot vositalari xabar berishicha, ota-onalar bu ismni tanlashlarini “yangi texnologiyalar va sun’iy intellekt davriga hurmat belgisi” sifatida izohlashgan. Milliy Fuqarolik holatlari dalolatnomalarini yozish bo‘limi bu g‘ayrioddiy ismni hech qanday e’tirozsiz ro‘yxatdan o‘tkazgan.

Ko‘plab foydalanuvchilar hayratlanib, bunday ism kelajakda bolaga qiyinchilik tug‘dirishi mumkinligini ta’kidlab, o‘z shubhalarini bildirdilar. Boshqalar esa, aksincha, ota-onalarning bu qarorini original va hatto “ilg‘or” deb baholashgan.

Garchi Kolumbiya qonunchiligida muayyan ismlarga taqiq qo‘yilmagan bo‘lsa-da, Milliy reyestr xodimlari tanlangan ism bolani kamsitishi yoki uning obro‘siga putur yetkazishi mumkin deb hisoblasa, ro‘yxatdan o‘tkazishni rad etish huquqiga ega.

Bundan avval AQSHda erkak ChatGPT maslahati sababli ruhiy kasalliklar shifoxonasiga tushib qolgani xabar qilingandi. 

Avgust oyi boshida OpenAI nozik mavzularda foydalanuvchilar bilan muloqot qilishda mas’uliyatni oshirishga qaratilgan ChatGPT xulq-atvor modelining yangilanishini e’lon qilgandi. Endi chat-bot “juftidan ajralish kerakmi” kabi shaxsiy yoki hissiy so‘rovlarga to‘g‘ridan-to‘g‘ri maslahat bermaydi