AQSHda erkak ChatGPT maslahati sababli ruhiy kasalliklar shifoxonasiga tushib qoldi. Bu haqda amerikalik mutaxassislar maqolasiga tayanib, Annals of Internal Medicine xabar berdi.
U sun’iy intellekt maslahati bilan 3 oy davomida tuz o‘rniga bromid iste’mol qilgan. Oqibatda zaharlanish yuz berib, psixoz rivojlangan. Bemor paranoyya, gallyutsinatsiyalar bilan kasalxonaga murojaat qilgan, u hatto suv iste‘molidan ham bosh tortgan.
Erkak o‘zini qo‘shnisi tomonidan zaharlagan deb o‘ylagan. Biroq shifokorlar tekshiruvda uning bromid bilan zaharlanganini aniqlagan. Shu sababli bemor ruhiy kasalliklar bo‘limida majburiy davolanishga qoldirilgan.
Erkakning so‘zlariga ko‘ra, u tuz iste’molini kamaytirmoqchi bo‘lgan va ChatGPT maslahati bilan internetdan bromid sotib olib, uni iste’mol qilgan. Shifokorlar ChatGPT’ni tekshirib, u bunday tavsiyani ogohlantirmasdan berishi mumkinligini tasdiqlagan.
Uch haftalik davolanishdan so‘ng erkak sog‘ayib, kasalxonadan chiqarilgan. Vashington universiteti shifokorlari ta’kidlashicha, bromid ilgari tibbiyotda qo‘llanilgan, ammo uzoq muddat iste’mol qilinganda zaharli ta’sir ko‘rsatishi aniqlangach, undan voz kechilgan. Hozirda u faqat ayrim veterinariya preparatlari va qo‘shimchalarida uchraydi.
Psixoz — ruhiy holat bo‘lib, unda odam haqiqatni to‘g‘ri idrok eta olmaydi. Bu holatda odam mantiqsiz gaplar aytishi, voqealarni noto‘g‘ri talqin qilishi mumkin. Gallyutsinatsiya esa psixozning eng keng tarqalgan belgisidir. U mavjud bo‘lmagan narsalarni ko‘rish, eshitish yoki sezish holati.
Izoh (0)