Buyuk Britaniya sog‘liqni saqlash xavfsizligi agentligi (UKHSA) mamlakatda chivin orqali yuqadigan chikungunya virusi bilan kasallanish holatlari ikki barobardan ortganini ma’lum qildi. Bu haqda BBC xabar berdi.
Agentlik ma’lumotlariga ko‘ra, asosan Afrika va Janubiy Osiyoda uchraydigan, kutilmaganda isitma va bo‘g‘im og‘rig‘iga sabab bo‘ladigan chikungunya virusi bilan kasallanish holatlari yilning dastlabki 6 oyida 70 tadan oshgan. Bu 2024-yilning shu davriga nisbatan 2 barobardan ko‘p degani (27 ta holat qayd etilgan edi). Bu holatlar asosan sayyohlar va xorijga sayohatlar bilan bog‘lanmoqda.
Chikungunya odatda o‘limga olib kelmaydi, ammo ba’zi bemorlar bo‘g‘im og‘rig‘ini yillar davomida his qilishi mumkin. Ko‘pchilik ikki hafta ichida to‘liq tuzaladi, juda kam hollarda kasallik o‘lim bilan yakunlanadi. Agentlik Hind okeani mintaqasida virus tarqalayotgani, Britaniyadagi deyarli barcha yangi holatlar Hindiston, Shri-Lanka va Mavrikiydan qaytgan sayohatchilar orasida aniqlanganini bildirmoqda. Virus ikki turdagi chivin orqali yuqadi, ammo ular Buyuk Britaniyada uchramaydi.
UKHSA’ning jamoat salomatligi bo‘yicha maslahatchisi doktor Filipp Vil sayohatchilarga chivin chaqishidan saqlanish uchun quyidagi choralarini ko‘rishni tavsiya etdi:
“Chikungunya jiddiy kasallikka aylanib ketishi mumkin. Sayohat vaqtida hasharotlarga qarshi vositalardan foydalanish, tanani yopiq kiyim bilan himoyalash va insektitsid bilan ishlov berilgan moskit to‘rlar ostida uxlash zarur”.
Yuqori xavfli hududlarga boruvchilar uchun chikungunya vaksinasini olish tavsiya qilinmoqda. Britaniyada chikungunyadan tashqari ilk bor odatda Markaziy va Janubiy Amerika hamda Karib dengizi hududlarida uchraydigan Oropouche virusi holatlari ham qayd etilmoqda. U asosan mayda pashsha chaqishi orqali yuqadi. Buyuk Britaniya yoki Yevropada uning tarqatuvchi turlari mavjud emas. Virus belgilari yuqori isitma, titroq, bosh og‘rig‘i, bo‘g‘im va mushak og‘rig‘ida namoyon bo‘ladi. Dunyo bo‘ylab 2024-yildan beri Oropouche bilan kasallanish ko‘paygan, homilador ayollarga esa ushbu virusning ehtimoliy ta’siri bois alohida ehtiyot choralarini ko‘rish tavsiya etiladi.
Ma’lumot o‘rnida, bundan oldinroq Xitoyda chukungunya bilan kasallanish holatlari 7 mingdan oshgani xabar berilgan edi. Mamlakatda aholiga idishlar (guldon, kofe mashinasi va h.k)dagi suvlarni ishlatishda ehtiyot bo‘lish tavsiya etilgan. Ehtiyot choralariga amal qilmaganlarga 10 ming yuan (taxminan 1400 dollar) jarima solinayotgani aytilgan.
Izoh (0)