Xitoyda chivin chaqishi orqali yuqadigan chikungunya virusi tez sur’atda tarqalmoqda. Guangdong provinsiyasida ushbu kasallikka chalinganlar soni 7 mingdan oshdi. Bu haqda BBC xabar berdi.
Eng ko‘p kasallik qayd etilgan hudud Foshan shahri bo‘lib, bu yerda bemorlar kasalxonaga yotqizilganidan keyin, test manfiy natija ko‘rsatsa yoki bir hafta o‘tgach chiqarib yuborilmoqda. Ushbu virus odatda isitma va kuchli bo‘g‘im og‘rig‘iga sabab bo‘ladi. Ba’zi hollarda bu og‘riq yillar mobaynida ham davom etishi mumkin.
So‘nggi haftada mamlakatda deyarli 3 mingta yangi holat aniqlangan. Virus infeksiyalangan odamni chaqqan chivin orqali tarqaladi. Shunga qaramay, Xitoyda bu virus yuqumli emasligi haqida rasmiy bayonot berilgan. Rasmiylarga ko‘ra, kasallarning 95 foizi bir hafta ichida sog‘ayib ketmoqda. Ammo kasallik haqidagi ma’lumotning kamligi odamlar orasida xavotir keltirib chiqargan.
“Bu juda qo‘rqinchli. Uzoq davom etadigan og‘riqlar juda azobli bo‘lsa kerak”, deb yozgan internet foydalanuvchilaridan biri.
Qo‘shni Gongkongda ham ilk kasallik holati qayd etilgan – 12 yoshli bolada Foshan shahri safaridan qaytgach isitma, toshma va bo‘g‘im og‘rig‘i belgilarini namoyon qilgan. Bu orada AQSH o‘z fuqarolarini Xitoyga safar qilishda hushyorlikka chaqirmoqda. Xitoy rasmiylari esa virus tarqalishining oldini olish uchun keskin choralar ko‘rmoqda. Aholiga idishlar (guldon, idish, kofe mashinasi)dagi suvlarni ishlatishda ehtiyot bo‘lish aytilgan. Bunga amal qilmaganlarga 10 ming yuan (taxminan 1 400 dollar) jarima solinadi. Hukumat virus tarqalishini cheklash uchun COVID-19 pandemiyasidagi kabi qat’iy choralarni qo‘llamoqda.
Shuningdek, hukumat chivinlarga qarshi kurashda maxsus “fil chivinlari” va suvdagi chivin lichinkalarini yeb yuboradigan baliqlarni ham qo‘llamoqda. Foshan shahrida 5 mingdan ortiq shunday baliqlar suv havzalariga tashlangan. Havo dronlari esa suv yig‘ilgan joylarni aniqlashda foydalanilmoqda.
Izoh (0)