Jinoyat ishlari bo‘yicha Yunusobod tuman sudida sudya Sardor Sodiqov raisligida sobiq qishloq xo‘jaligi vaziri Aziz Voitov va 49 nafar sudlanuvchi ishi ko‘rib chiqilayotgani haqida xabar berilgandi. Sudning 6-sentyabr kuni davom etgan majlisida OAV vakillari faoliyati cheklab qo‘yilgan bo‘lsa, 12-sentyabr kuni davom etgan majlisida sud ishi yopiq ekani ma’lum qilindi va barcha jurnalistlar sud zalidan chiqarib yuborildi. Bu haqda sud majlisida ishtirok etgan “Daryo” jurnalisti xabar berdi.
Bunga fuqaroviy da’vogarlardan biri — Qishloq xo‘jaligi vazirligi qoshidagi xizmat ko‘rsatish agentligining shu haqdagi iltimosnomasi sabab bo‘ldi.
Sudning 12-sentyabrdagi majlisida dabdurstdan paydo bo‘lgan fuqaroviy da’vogarlardan biri — Qishloq xo‘jaligi vazirligi qoshidagi xizmat ko‘rsatish agentligi vakili G‘ofur Mahkamov sudga iltimosnoma kiritib, majlisni yopiq tarzda davom ettirishni so‘radi.
Fuqaroviy da’vogarlardan yana biri “Milliy bank” vakillari avvalgi sud majlislarida ham qatnashgan ekan. Sudya bu safargi sud majlisida vakilning o‘zgarib qolishidan ajablanar ekan, uning shaxsiga aniqlik kiritdi. Avvalgi sud majlisida boshqa birov qatnashgan, shekilli, bu safargi vakilning ism-famiyasi Kamolaxon Isayeva ekani oydinlashdi. Biroq vazirlik qoshidagi agentlik vakili fuqaroviy da’vogar sifatida sud majlisida bugun paydo bo‘ldi. Va bugun sudni yopiq o‘tkazish haqida iltimosnoma kiritdi, deydi sud majlisida qatnashgan OAV vakillaridan biri.
Sudda vazirlik qoshidagi agentlik vakilining iltimosnomasini tinglagan advokatlar, jumladan, advokat Qilichov, Rahmatov, Alimov va Yangiboyevlar hamda aksariyat sudlanuvchilar bu iltimosnomani rad etishni, boisi Jinoyat-protsessual kodeksida 2 xil holatda davlat siri va jinsiy zo‘ravonlik bilan bog‘liq holatlarda yopiq sud majlislari bo‘lishi belgilanganini eslatdi.
Sud ishiga raislik qiluvchi Sardor Sodiqov bir necha advokatlar va sudlanuvchilarning sud majlisi ochiq bo‘lishini so‘ragani, shuningdek, sanoqli advokatlarning sudga havola qilishi haqidagi so‘zlarini tinglasa-da, “xizmat doirasidan foydalanish mumkin bo‘lgan ma’lumotlar yangrashini inobatga olgan holda shunday qarorga keldik”, deya sudni yopiq deb e’lon qildi. Hamda jurnalistlardan buni to‘g‘ri tushunishni so‘radi.
Eslatib o‘tamiz, sudning 6-sentyabr kuni davom etgan majlisida OAV vakillari faoliyati cheklab qo‘yilgach, “Kun.uz”, “Gazeta.uz” va “Qalampir.uz” sayti jurnalistlari “Daryo” jurnalistining savoliga javoban buni qoralashini ma’lum qilgandi.
Masalan, Nukus voqealari ishi, shuningdek, “Dok-1 Maks” aybdorlari ishi ko‘rib chiqilgan sud majlislarida dastlab sudlanuvchilar va advokatlar OAV ishtirokiga qarshi bo‘lsa-da, sudya bu ishlar jamoatchilik nazoratida ekanini, shuningdek, sudning shaffofligini ta’minlash uchun ham majlislarda jurnalistlar ishtiroki muhim deya, bizning ishlashimiz uchun zamin yaratgandi. Nukus voqealari sudi “Gazeta.uz” sayti orqali onlayn yoritib borilgandi, degandi “Gazeta.uz” jurnalisti Mirolim Isajonov.
Shundan so‘ng, Korrupsiyaga qarshi kurashish agentligi Aziz Voitov sudi jamoatchilik uchun ochiq tarzda o‘tkazilishi kerak, degan chaqiriq bilan chiqdi.
O‘zbekiston Respublikasi prezidentining 2021-yil 16-iyundagi PF-6247-son farmoniga muvofiq, davlat xizmatchilarining kasbiy faoliyati bilan bog‘liq huquqbuzarliklarga oid ishlar bo‘yicha sud majlislari telekanallar, shuningdek, internet tarmog‘i orqali jonli efirga uzatilishi lozimligi belgilangan. Shunga asosan, Korrupsiyaga qarshi kurashish agentligi mazkur sud majlisi yuqoridagi Farmon talablari asosida jamoatchilik uchun ochiq tarzda o‘tkazilishi maqsadga muvofiq ekanligini ma’lum qiladi, degandi mas’ullar.
Izoh (0)