Shavkat Mirziyoyev 7-fevral kuni xizmat ko‘rsatish sohalarini rivojlantirish bo‘yicha asosiy vazifalar muhokamasi yuzasidan videoselektor yig‘ilishida mutasaddilarga onlayn kredit olish tartibini soddalashtirish bo‘yicha qaror ishlab chiqib, kiritishni topshirdi.
O‘zbekistonda 2025-yil 1-aprelgacha banklarda onlayn kredit ajratish bo‘yicha vaqtinchalik tartib yo‘lga qo‘yilgandi. Unga ko‘ra, fuqarolardan kredit tashkilotining mobil ilovasi orqali kredit ajratish bo‘yicha ariza yuborish jarayonida biometrik identifikatsiyadan o‘tish talab etiladi. Bu kredit olish uchun ariza fuqaroning shaxsan o‘zi tomonidan berilganini aniqlash va uning shaxsiga yana bir bor oydinlik kiritish uchun kerak.
Shu bilan birga, fuqaro tomonidan kredit olishga ariza yuborilgandan so‘ng uning kredit tarixi 2 bosqichda (ariza tushgandan so‘ng hamda kredit mablag‘lari ajratilishidan oldin) o‘rganiladi. Tekshiruv natijasiga ko‘ra, mijozning qarz yuki oshgani yoki muddati o‘tgan qarzdorlik mavjudligi aniqlansa, kredit ajratish rad etilishi yoki boshqa summada ajratilishi to‘g‘risida xabar beriladi.
Markaziy bank mutasaddilari mazkur tizim firibgarlar aldoviga uchgan fuqarolar nomiga bir nechta kredit tashkilotlaridan kredit mablag‘lari ajratilishining oldini olishini aytgandi. Markaziy bank tomonidan taqdim etilgan ma’lumotlarga ko‘ra, 2024-yilda firibgarlik yo‘li bilan fuqarolar nomiga onlayn kredit ajratish orqali 463 ta holatda qariyb 15 milliard so‘m miqdorda moddiy zarar yetkazilgan.
Shavkat Mirziyoyev yig‘ilishda banklar joriy yilda masofaviy xizmat ko‘rsatishni kamida 30 foizga o‘stirishi muhimligi ham ta’kidlab o‘tdi.
Izoh (0)