O‘zbekistonda 68 nafar bolaning o‘limi va 16 nafar bolaning nogiron bo‘lib qolishiga sababchi bo‘lgan sirop ishlab chiqaruvchisi O‘zbekiston DXX tomonidan qidiruvga berilgani, Yunusobod tuman sudi uni qamoqqa olish haqida ajrim chiqargani xabar berilgandi. O‘zbekistonlik advokatlar qidiruvdagi tadbirkorni tutish uchun Hindiston dorilarining O‘zbekistonga import qilinishiga chek qo‘yishni taklif qilmoqda. Bu haqda “Daryo” jurnalisti xabar berdi.
Biz qidiruvdagi hindistonlik tadbirkorni ushlash va uni asosiy aybdor sifatida javobgarlikka tortilishi uchun sudga O‘zbekiston tomon Hindistondan olib kelinayotgan barcha dorilar importini cheklashi kerakligini aytdik. Shu haqda iltimosnoma kiritib, sud mas’ul tashkilotlarga bu haqida taklif berishi kerakligini, shu yo‘l orqali qochib yurgan Sachinni qo‘lga olish mumkinligini tushuntiryapmiz. Biz bundan boshqa to‘g‘ri yo‘lni ko‘rmayapmiz, — deydi advokat Temur Rahmatov.
Hindistonga borib, Sachin Jain haqida surishtiruv olib borgan advkotlarning aytishicha, Sachin Hindistonda 27 ta, uning xotini Jaya Jain esa 26 ta kompaniyaga egalik qiladi.
Dastlabki instansiya solidar tartibda bir nechta sudlanuvchilardan tovon puli undirilishini belgilagan. Lekin bu sudlanuvchilarda buncha pul yo‘q-ku. Bor bo‘lsa, bitta mashinasi, uyi bordir. Lekin ular qanchaga tortadi? Ammo Sachin Jainda million-millionlik dollarlik kompaniyalar bor. Lekin bunga hech kim e’tibor bermayapti, — deydi advokat.
Aniqlashtirilishicha, Hindistonda ayni kunda korxona va uning 5 nafar mas’uli — kompaniya direktori Sachin Jayn, uning xotini Jaya Jayn, boshqaruvchisi Tuxin Bxattacharya, kimyogar Atul Ravat va Mul Singxlarga qarshi jinoyat ishi ochilgan.
Hindiston qonunchiligi bo‘yicha sirop ishlab chiqaruvchilariga qo‘yilayotgan ayblovlar tasdiqlansa, aybdorlarga olti oylik qamoq jazosi yoki 1000 rupiy, o‘zbek so‘mida 150 ming so‘m jarima jazosi tayinlanishi mumkin. Boisi Hindiston davlati sirop ishlab chiqaruvchilarni noqonuniy va sifatsiz dori ishlab chiqarishda ayblagan, xolos. O‘zbekistonda sirop mavzusi ko‘tarilgan paytda ya’ni 2022-yilning noyabr, dekabr oylarida Hindiston politsiyasi Marion Biotech Pvt. Ltd. korxonasining sifatsiz dorilari sabab O‘zbekistonda bolalar zaharlanayotgani haqida ma’lumot olgan. Undan keyingi jarayonlar, jumladan marhumlar 68 nafar ekani, 16 nafar bola nogiron bo‘lib qolgani haqidagi ma’lumotlar esa ularga yetkazilmagan. Shu sabab Hindiston qonunchiligi bo‘yicha Sachin boshchiligidagi ishlab chiqaruvchi korxona mas’ullariga yengil ayblovlar qo‘yilgan. Bu og‘irdir, ammo biz buning yechimini shunda ko‘ryapmiz. Hindistonning barcha dorilari kirishiga cheklov qo‘ysak, Hindiston tomonning o‘zi Sachinni ushlab beradi, — deydi advokat.
Izoh (0)