Qashqadaryo, Buxoro viloyatlari va Toshkent shahrida noqonuniy ish uchun pul olgan soliqchilar ushlandi (video)

Qashqadaryo, Buxoro viloyatlari hamda Toshkent shahrida soliq xodimlarining noqonuniy harakatlariga chek qo‘yildi.

Davlat xavfsizlik xizmatining Qashqadaryo viloyati bo‘yicha boshqarmasi xodimlari tomonidan o‘tkazilgan tezkor tadbirda Qarshi tuman soliq inspeksiyasining sayyor soliq tekshiruvlari sho‘basi bosh inspektori mahalliy 5 ta MCHJ faoliyati yuzasidan joriy yilning sentyabr oyiga qadar kameral soliq tekshiruvlari o‘tkazmaslik evaziga 2300 dollar olgan vaqtida ashyoviy dalillar bilan ushlandi.

Shuningdek, u ushbu pul mablag‘ini viloyat soliq boshqarmasining kameral soliq tekshiruvlari sho‘basi bosh inspektoriga berishi kerakligi aniqlanib, tezkor tadbir davom ettirildi hamda mazkur mansabdor shaxs ham 2300 dollarni olgan vaqtida ushlandi.

Buxoro viloyati G‘ijduvon tuman soliq inspeksiyasi katta inspektori o‘z xizmat mavqeyidan foydalanib, tuman markazidagi “Ho‘jai jahon” savdo kompleksi hududida faoliyat yurituvchi yakka tartibdagi tadbirkorni joriy yilning oxiriga qadar aylanma soliq to‘lovchisi toifasidan, har oyda 2 million 424 ming so‘m to‘laydigan qat’iy turdagi soliq to‘lovchisi toifasiga o‘tkazmaslik, kelgusida soliq idoralari tomonidan bo‘ladigan tekshiruvlardan himoya etish hamda uning faoliyatiga rahnamolik qilish evaziga 8 million so‘m olgan vaqtida Davlat xavfsizlik xizmati va Bosh prokuratura huzuridagi departament xodimlari tomonidan ushlandi.

Toshkent shahar Yakkasaroy tumanida joylashgan umumiy ovqatlanish maskanida 6 oy mobaynida soliq tekshiruvlari o‘tkazmaslik, aksincha, uning faoliyatiga rahnamolik qilish evaziga 600 dollar olgan vaqtida mazkur tuman soliq inspeksiyasining bosh inspektori Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan ashyoviy dalillar bilan ushlandi.

Shuningdek, tergovga qadar tekshiruv davomida, ushbu noqonuniy ishga tuman soliq inspeksiyasining sho‘ba boshlig‘ining aloqador ekanligi aniqlanib, u ham prosessual tartibda ushlandi.

Toshkent viloyatining Yuqori Chirchiq tumanidagi MCHJ faoliyati bo‘yicha o‘tkazilgan soliq auditi tekshiruvi natijasida aniqlangan 267 million 300 ming so‘m qo‘shilgan qiymat solig‘i va 664 million 700 ming so‘m sof foyda solig‘ini mansabdor tanishlari orqali kamaytirib berish evaziga 5 ming dollar olgan vaqtida mazkur tuman soliq inspeksiyasining kameral nazorat sho‘basining sobiq boshlig‘i ushlandi.

Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.