Xitoylik taykonavtlar “Tyangun” milliy orbital stansiyasi bortidan ochiq kosmosga bir necha soatlik muvaffaqiyatli chiqishni amalga oshirdi. Bu haqda XXR Boshqariladigan kosmik parvozlar dasturi boshqarmasi (CMSA) xabar berdi.
Ma’lum qilinishicha, taykonavtlar Chen Dun va Chen Chjunjuy 22-may kuni kosmik bo‘shliqda jami sakkiz soat bo‘lishgan.
“Ular robotlashtirilgan manipulyator yordamida meteoritlardan himoya elementlarini o‘rnatdilar va stansiyaning tashqi uskunalari holatini tekshirdilar. Ekipajning uchinchi a’zosi - Van Sze “Tyanxe” asosiy moduli bortidan hamkasblarining ishini qo‘llab-quvvatlab turdi”, deyiladi xabarda.
Taykonavtlar stansiyaga 24-aprelda boshqariladigan “Shenchjou-20” kemasi orqali yetib borishgan. Ularning vazifasi oktyabrgacha davom etadi, shundan so‘ng ularni yangi ekipaj almashtirishi kerak.
Ta`kidlanishicha, “Shenchjou-20” vazifasi “Tyangun” stansiyasiga to‘qqizinchi ekipaj ekspeditsiyasi bo‘ldi.
Taxminan 400 km balandlikdagi orbitada joylashgan Xitoy kosmik stansiyasi uchta taykonavtga mo‘ljallangan, biroq ekipajlar almashinuvi paytida olti kishigacha vaqtincha qabul qilishi mumkin.
Stansiya “Tyanxe” asosiy moduli va unga ikki tomondan ulangan ikkita laboratoriya moduli – “Mentyan” va “Ventyan”dan iborat bo‘lib, ular vaznsizlik sharoitida ilmiy tadqiqotlar va tajribalar o‘tkazish uchun foydalaniladi. U uchta ulanish nuqtasi va kosmosga chiqish uchun shlyuz bilan jihozlangan.
Xitoyning “Tyangun” orbital laboratoriyasi Xalqaro kosmik stansiyadan besh baravar kichik. Uning ishlash muddati kamida 10 yilga mo‘ljallangan.
Izoh (0)