Prezident huzuridagi Ijtimoiy himoya milliy agentligida 24-iyun kuni BMT Bolalar jamg‘armasining (UNICEF) O‘zbekistondagi vakolatxonasi rahbari Regina Mariya Kastillo bilan uchrashuv bo‘lib o‘tdi.
Unda agentlik direktori Mansurbek Olloyorov va uning birinchi o‘rinbosari Shahnoza Mirziyoyeva ishtirok etdi. Uchrashuvda UNICEF va agentlik o‘rtasidagi amaldagi va kelgusi hamkorlik loyihalari muhokama qilindi.
UNICEF agentlik tashkil etilganidan buyon uni doimiy qo‘llab-quvvatlab kelayotgani, bilim, xalqaro tajriba, texnik yordam va mutaxassislarni jalb etishdagi harakatlari ta’kidlandi. Ijtimoiy xizmatlar ko‘rsatishda keys-menejment tizimini joriy etish bo‘yicha muvaffaqiyatli tashabbusga, shuningdek, ijtimoiy himoya tizimi xodimlarining malakasini oshirishga qaratilgan tadbirlar ko‘lamini kengaytirishga alohida e’tibor qaratildi.
O‘z navbatida Regina Kastillo agentlik faoliyati va tashkil etilganidan buyon erishgan natijalarini yuqori baholadi. Shuningdek, bolalar uchun ijtimoiy xizmatlar ko‘rsatishning yaxlit tizimini yaratish muhimligi ta’kidlandi.
Uchrashuv yakunida tomonlar kelgusida samarali hamkorlik aloqalarini mustahkamlashga ishonch bildirdi.
Izoh (0)