Ukraina jahon savdosidagi bo‘linish va Yevropa davlatlari bilan aloqalarning kuchayib borayotgani sababli AQSH dollaridan voz kechib, yevroga o‘tmoqchi. Bu haqda Ukraina Milliy banki rahbari Andrey Pishniy Reuters agentligiga bergan intervyusida ma’lum qildi.
Pishniyning so‘zlariga ko‘ra, Yevropa Ittifoqiga a’zo bo‘lish istiqboli, Yevroittifoqning Ukraina mudofaasini ta’minlashdagi roli, global bozorlardagi o‘zgaruvchanlik va xalqaro savdoning bo‘linib ketish ehtimoli bunga turtki bo‘lmoqda. Milliy bank Ukraina grivnasi uchun dollar o‘rniga yevro asosiy valyuta bo‘lishi kerakligini ko‘rib chiqdi.
Bu murakkab ish bo‘lib, sifatli va har tomonlama tayyorgarlikni talab etadi, dedi Pishniy.
U hozircha AQSH dollari bilan amalga oshirilayotgan operatsiyalar hamon valyuta bozorining barcha segmentlarida ustunlik qilayotganini aytdi. Biroq yevroda ifodalangan operatsiyalar ulushi ko‘plab yo‘nalishlarda o‘sib borayotganini qo‘shimcha qildi.
AQSH dollari — bugungi vaziyat qanday?
Dollar xalqaro savdoda yetakchi valyuta bo‘lib qolmoqda, shuningdek, global zaxiraviy valyutalarning katta qismini tashkil etadi. Masalan, Saudiya Arabistoni va Gonkong kabi yirik iqtisodiyotlar o‘z valyutalarini dollarga nisbatan barqaror ushlab turmoqda.
Biroq Donald Tramp prezidentligi davrida AQSH global savdo urushini boshlab, oxirgi yuz yillikdagi eng yuqori boj stavkalarini joriy qildi. Bu esa ayrim ekspertlarda dollarning global zaxiraviy valyuta sifatidagi kelajagiga shubha uyg‘otdi.
Shuningdek, Tramp Oq uyga qaytganidan beri dollar kursi asosiy valyutalarga nisbatan 9 foizdan ko‘proqqa pasaygan. Chunki investorlar Amerika aktivlariga egalik qilishdan bosh tortmoqda.
Izoh (0)