Rossiya prezidenti Vladimir Putin 20-may kuni Kursk viloyatiga tashrif buyurdi. Bu haqda Rossiya prezidenti matbuot xizmati xabar berdi.
Kremlning ta’kidlashicha, 20-may kuni tashrif chog‘ida Putin ko‘ngilli tashkilot vakillari bilan uchrashgan va Kursk-II atom elektr stansiyasiga tashrif buyurgan.
Davlat televideniyesi Putinning ko‘ngillilar va mahalliy amaldorlar, jumladan gubernator vazifasini bajaruvchi Aleksandr Xinshteyn bilan uchrashganini ko‘rsatgan. Prezidentga Kreml shtab boshlig‘ining birinchi o‘rinbosari Sergey Kiriyenko hamrohlik qilgan.
“Bo‘linmalarimiz oldida turgan barcha jangovar vazifalar bajarilishiga va Kursk viloyati hududi tez orada dushmandan to‘liq ozod qilinishiga ishonaman”, dedi u davlat televideniyesi efirida.
Rossiya Qurolli kuchlari bosh shtabi boshlig‘i Valeriy Gerasimov 26-aprelda Kursk to‘liq ozod etilganini aytgandi. Ukraina Qurolli kuchlari esa ma’lumotni rad etgandi.
2024-yil 6-avgustda Ukraina armiyasi Kursk viloyatida harbiy operatsiyani boshladi. 12-avgustga kelib 28 ta aholi punkti Ukraina kuchlari nazoratiga o‘tgani haqida o‘sha paytda viloyat gubernatori vazifasini bajaruvchi Aleksey Smirnov xabar berdi. Yanvar oyida Rossiya Mudofaa vazirligi Ukraina tomoni mintaqaning 1 268 kv/km hududini egallab olganini ma’lum qildi (Kursk viloyatining umumiy maydoni — 29,9 ming kv/km). 2025-yil yanvar oyi o‘rtalariga kelib, Rossiya idorasi ma’lumotlariga ko‘ra, 801 kv/km (63,2 foiz) qaytarib olishga erishilgan. Fevral oyida esa Kursk viloyatining 64 foizi nazoratga qaytarilgan.
Zelenskiyning so‘zlariga ko‘ra, Kurskdagi operatsiyaning asosiy vazifasi Rossiyaning harbiy salohiyatini imkon qadar yo‘q qilish, qarshi hujumlarni kuchaytirish hamda Rossiya hududida bufer zona yaratishdan iboratdir. Aprel oyida Rossiya prezidenti Vladimir Putin Kursk viloyati to‘liq ozod etilganini e’lon qildi. Ukraina Qurolli kuchlari esa viloyatdagi janglar davom etayotganini ma’lum qildi.
Ma’lumot o‘rnida Putin oldin mart oyida Kurskka borib, frontdagi vaziyat bilan tanishgan edi. Bu Ukraina kuchlari 2024-yilning 14-avgust kuni mazkur yo‘nalishda hujumga o‘tganidan beri ilk tashrif bo‘lgan.
Kreml tomonidan e’lon qilingan kadrlarda uning Kursk viloyatidagi qo‘mondonlik markaziga harbiy formada kelgani, u yerda Putinni Rossiya qurolli kuchlari bosh shtabi rahbari Valeriy Gerasimov kutib olgani aks etgan edi.
U, shuningdek, Xalqaro Jeneva konvensiyasi me’yorlari Ukraina tomonida jang qilgan xorijlik jangchilarga nisbatan tatbiq etilmasligini aytgan.
Kurskdagi vaziyat
Rossiya qurolli kuchlari Bosh shtabi rahbari Putinga hisobot berib, Kursk viloyatida jang qilayotgan Ukraina qo‘shinlari qurshovga olinganini aytgan.
Putin rus qo‘mondonlariga Ukraina qo‘shinlarini Kursk viloyatidan imkon qadar tezroq chiqarib yuborishni buyurgan.
Rossiya rahbari, shuningdek, Ukrainaning Kursk viloyati bilan chegaradosh Sumi viloyatida bufer zona yaratish varianti ko‘rib chiqilayotganini ma’lum qilgan. Uning so‘zlariga ko‘ra, mazkur tashabbus Ukraina kuchlarining ehtimoliy hujumlaridan “sug‘urtalanish”ga yordam beradi.
Gerasimovning aytishicha, Rossiya armiyasi Kursk yo‘nalishida Ukraina nazoratida bo‘lgan hududlarning 86 foizini qaytarib olgan. Bu esa taxminan 1 100 kvadrat kilometr maydonni tashkil qiladi.
Bosh shtab rahbarining da’vo qilishicha, Ukraina tomoni Kursk viloyatini Rossiya bilan kelgusidagi muzokaralarda ayirboshlash uchun “karta” sifatida foydalanmoqchi bo‘lgan, biroq bu reja ish bermagan.
Bundan tashqari, u “Kursk operatsiyasi”dan ko‘zlangan yana bir maqsad — “Rossiya qo‘mondonligini Donbass frontidan kuchlarini olib chiqishga majburlash” ham amalga oshmaganini ta’kidlagan
Qarshi tomon nima deydi?
Putinning Kursk viloyatiga tashrifi bilan bir vaqtda Ukraina qurolli kuchlari bosh qo‘mondoni yo‘qotishlarni kamaytirish uchun chekinish buyruq berishi mumkinligiga shama qilgan.
Ukraina prezidenti esa Kiyev o‘z askarlari hayotini saqlab qolish uchun maksimal harakat qilayotganini ta’kidlagan.
Ukraina tomoni mazkur yo‘nalishidagi vaziyatga rasman aniqlik kiritmagan bo‘lsa-da, Financial Times nashri Kiyev eng jangovar brigadalarni Kursk viloyatidan bosqichma-bosqich olib chiqayotgani haqida xabar berdi. DeepState loyihasi esa interaktiv xaritani yangilab, Sudja shahrini Ukraina armiyasi nazoratidan chiqarib tashladi.
Izoh (0)